Ustad Haji Yulio Muslim, António da Costa

DILI, 12 juñu 2019 (TATOLI)—Líder Meskita An’nur, hateten husi perspetiva musulmanu nian, soe bebé ne’e sala-boot tanba hahalok ida ne’e hatudu katak feto ne’ebé soe bebé ne’e la hahí moris ne’e rasik hanesan moris ne’ebé santu. Tanba, bebé ne’ebé moris ne’e sala laek maibé ida ne’ebé halo sala ne’e mak ema ida ne’ebé soe bebé ne’e.

“Musulmanu haree kona-ba soe bebé ne’e nu’udar sala-boot ida. Hahalok soe bebé nu’udar maneira ida ne’ebé la hahí moris ne’e rasik hanesan prezente ne’ebé Maromak fó ba ema ida-idak. Tanba, bebé ne’e nu’udar ema ne’ebé sala laek. Iha perspetiva musulmanu nian, bebé ne’ebé moris ne’e sala laek maibé ida ne’ebé sala ne’e mak ninia inan-aman sira,” dehan Ustad Haji Yulio Muslim, António da Costa ba Agência TATOLI liuhusi entrevista iha nia kna’ar fatin, Meskita An’nur, Kampung Alor, Dili, kuarta ne’e, relasiona ho ema soe bebé iha Lahane, foin lalais liu-ba.

Atu prevene hahalok soe bebé ne’e labele akontese tan, nia hateten, musulmanu halo asaun prevensaun ne’e hahú husi oinsá musulmanu bandu relasaun seksuál entre feto no mane sira ne’ebé seidauk sai feen ho la’en (seidauk simu sakramentu kaben). Se seidauk halo juramentu iha Maromak nia oin nu’udar feen ho laen, labele halo relasaun seksuál tanba tuir doutriña katak “zina” (halo sala) iha musulmanu nia laran mak kazamentu ida ne’ebé la legál.

“Iha musulamnu nia laran, ami aplika bandu ka regra ne’e atu kuidadu para lebele akontese problema sosiál hanesan soe bebé iha dalan ninin ka naran fatin ne’ebé de’it. Imposível se ema ne’ebé kazamentu legál, sira-nia oan moris mai, sira soe tiha bebé ne’e. Ema ne’ebé soe bebé ne’e signifika katak bebé ne’e rezultadu husi relasaun ne’ebé relijiaun bandu,” António esplika.

Nia hatutan, hahalok ransu livre no “zina” (halo sala) ida ne’e ninia konsekuénsia mak bele hamosu moras sosiál ida ne’ebé babain ema hanaran HIV/SIDA. Tanba ne’e, nia sujere, família ka timoroan ida-ida tenke leno-án fali ba doutriña beila sira nian iha tempu uluk ne’ebé bandu oan-feto sira labele sai arbiru.

“Ha’u bele hateten katak soe bebé ne’e akontese tanba responsabilidade sosiál ne’ebé fraku tebes. Espesífikamente, iha biban teknolojia avansadu agora, inan-aman sira lakon sensibilidade sosiál, oan feto sira, sira husik la’o livre ho mane sé de’it, maski seidauk simu malu iha igreja. To’o ikus, nia rezultadu mak ita tenke responsabiliza ba problema sosiál hanesan soe bebé ne’e,” nia dehan.

Tanba ne’e, nu’udar líder Meskita An’nur, nia apela ba feto sira atu hadomi sira-nia moris ho responsabilidade. Tanba, nia tenik, ema ida liliu feto sira laiha tempu atu moris ba dala rua. La’o sala dalan dala ida, sira-nia moris ne’e rahun husi rohan ba rohan tanba ninia kapitál moris nian mós rahun ona.

“Imajina didi’ak, ba feto sira, imi laiha tempu atu moris ba dala rua. Hanoin didi’ak ba! Imi hakat sala dala ida, imi-nia moris sai aat no imi-nia kapitál moris nian mós sai rahun leet de’it. Tanba, sente ka la sente, imi sei hamoe no hatuun imi-nia família nia dignidade tanba de’it imi soe bebé lahó responsabilidade,” nia apela.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here