Ministru Saúde, Bonifácio Maukoli dos Reis. Imajen Egas Cristovão

DILI, 12 juñu 2019 (TATOLI) – Governu liuhusi Ministériu Saúde (MS) planea ona atu kontrata tan médiku espesialista hosi Kuba, tanba médiku espesialista iha Ospitál Nasionál Guido Valadares (ONGV) la sufisiente.

“Loos duni katak médiku iha Ospitál Nasionál Guido Valadares menus duni, foin lalais ami halo hela negosiasaun ho brigada médiku Kubanu, governu hakarak kontrata tan médiku espesialista, maibé sei haree fali ba orsamentu”, hateten Ministru Saúde Interinu, Bonifácio Maukoli dos Reis, ba TATOLI iha Palásiu Governu, ohin.

Governante ne’e esklarese médiku espesialista ne’ebé presiza tan maka iha área neorogía, anestesista, ho cardiología, maibé ba medisina interna sei sufisiente. “Planu ne’e iha tinan ne’e, maibé sei haree fali ba orsamentu”, katak nia.

Bonifácio hatutan: “Presiza kontrata tan na’in rua ou tolu para bele nesesita, tanba iha ospitál referrál sira liga ho cirurgía presiza médiku espesialista ba área anestegía, tanba agora daudaun iha óspital referrál sira iha de’it infermeiru anestegista hodi fó asisténsia, más atu halo operasaun presiza espesialista área anestegía”.

Jornalista: Antónia Gusmão

Editora: Rita Almeida

http://www.tatoli.tl/2019/06/mediku-espesialista-iha-ongv-seidauk-sufisiente/

HAKEREK NO HATÁN

Please enter your comment!
Please enter your name here