Ustad Haji Yulio Muslim, António da Costa

DILI, 12 juñu 2019 (TATOLI)—Atu prevene foinsa’e sira labele mout iha ransu livre no halo relasaun seksual livre ne’ebé ninia impaktu to’o soe bebé iha dalan ninin, relijiaun musulmanu fó naroman ba foinsa’e sira liuhusi edukasaun morál no espirituál kona-ba relasaun seksuál livre.

“Atu prevene ida ne’e la’os relijiaun sira-nia responsabilidade mesak maibé komponente hotu-hotu ninia responsabilidade. Governu, mestre sira, jornalista, sosiedade Timor-Leste tomak no inan-aman sira maka tenke hola papél importante ida ne’e hodi hatudu dalan loos ba nia oan sira atu moris tuir doutriña Nai Maromak nian,” tenik Ustad Haji Yulio Muslim, António da Costa ba Agência TATOLI liuhusi entrevista iha nia kna’ar fatin, Meskita An’nur, Kampung Alor, Dili, ohin, relasiona ho ema soe bebé iha Lahane, foin lalais ne’e.

Líder Meskita An’nur ne’e informa, sira sempre fó edukasaun ba foinsa’e sira katak relasaun [seksuál] livre ne’e perigu no sei estraga sira-nia moris.

“Ida ne’e komponente hotu-hotu nia papél atu tau ida ne’e iha konsiderasaun. Tenke lori sira fila ba sira-nia fé atu bele fiel ba sira-nia relijiaun. Se musulmanu, tenke eduka sira sai musulmanu ne’ebé di’ak. Se katóliku, tenke hanorin sira sai katóliku ne’ebé di’ak no fiel. Tanba relijiaun ne’e hanesan forte (benteng) ba ita atu moris,” nia salienta.

Aleinde inan-aman, António informa, prinsipál liu mak ukun-na’in sira ka governu Timor-Leste iha papél importante tenke hanoin ona atu halo lei ka regulamentu kona-ba cyber crime, atu minimiza relasaun livre entre foinsa’e sira. Lei ka regulamentu refere tenke harii bazeia ba direitu umanu tanba ninia efeitu sai ekstraordináriu.

“Ida ne’e sai hanesan governu no Parlamentu Nasionál nia responsabilidade, nune’e labarik menór idade sira labele asesu ba situs pronografia ho livre. Referénsia hosi nasaun seluk, labarik menór idade sira labele asesu situs pornografia tanba iha lei ne’ebé regula sira. Iha Timor-Leste ne’e livre demais maibé forte (benteng) ba foinsa’e sira-nia án ne’e laiha. Konsiénsia relijiaun-nian mós fraku. Bainhira ema ida fiel ba relijiaun, nia iha forte (benteng) ida ne’ebé hamriik metin,” nia haklaken.

Hanesan iha relijiaun Katólika ne’ebé iha Maromak nia ukun fuan 10 ne’ebé sarani sira moris banati, nia hatutan, iha relijiaun musulmanu mós profeta Muhammad hanorin foinsa’e sira atu hatene serbisu no hatene halo jejun “suna” (puasa tambahan)  hodi bele tahan kakaan (nafsu) atu labele halo arbiru iha li’ur ne’ebá.

“Iha ukun-fuan, profeta Muhammad hateten, ‘Hai foinsa’e sira, sé mak bele ona responsabiliza atu bele haree no fó han ba ema ida mak nia bele kaben formalmente. Maibé nia seidauk bele, haruka nia jejun ‘suna’ atu tahan ninia kakaan (nafsu) atu labele halo arbiru. Solusaun mak ne’e, se nia seidauk kaben formalmente, haruka nia halo jejun ‘suna’ bazeia ba interese no nesesidade’,” António subliña.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here