Logotipu Banku Mundiál

DILI, 12 juñu 2019 (TATOLI)- Banku Mundiál (BM) liuhosi nia relatóriu foun 2019 nian, espera katak, kreximentu ekonómiku iha Timor-Leste sei aselera to’o porsentu 3.9 iha 2019 no iha 2020 bele to’o porsentu 4.6.

Relatóriu Ekonómiku Timor-Leste, abríl 2019 ne’e hatudu katak rekuperasaun ida ne’e sei hetan apoiu hosi despeza públiku ne’ebé maka’as, no mós konfiansa hosi konsumidór no negósiu sira ne’ebé hafoun filafali.

Relatóriu hosi Banku Mundiál ne’ebé publika dala rua kada tinan ho objetivu atu fó análize kontinuasaun kona-ba ekonomia Timór nian ne’e, afirma katak, diminuisaun ida ne’ebé maka’as iha despeza públika hafraku atividade ekonomia iha tinan 2017 no kontinua afeta kreximentu iha 2018.

Despeza públiku aumenta signifikativu tebes iha fulan tolu ikus iha tinan ida ne’e, maibé ida ne’e la sufisiente atu hasees-an hosi kontrasaun ba Produtu Internu Brutu (PIB) naun-petrolíferu ho porsentu 0.7. Maski nune’e, perspetiva ba tinan 2019 indika katak sei di’ak liu kompara ho fulan neen liu bá.

“Ho aprovasaun ba Orsamentu Jerál Estadu tinan 2019 nian iha fulan-fevereiru liu bá, ita hein katak rekuperasaun ekonómiku sei akontese,”  tenik Pedro Martins, ekonomista seniór ba Banku Mundiál Timor-Leste nian liuhosi komunikadu ne’ebé TATOLI asesu, ohin.

“Projesaun ba PIB hatudu katak PIB sei sa’e ba 3.9% ho senáriu ida katak iha estabilidade polítika no ekonomia. Ho aumenta despeza Governu nian, apár ho konsumu setór privadu ne’ebé forte, sei fó apoiu ba rekuperasaun ekonómika”.

Relatóriu ne’e mós haree katak inflasaun ba folin sasán sei nafatin ki’ik iha 2.3% no valór dollar amerikanu nian ne’ebé forte kontribui ba aumenta valór taxa ba interkámbiu reál-nian. Atividade komersiál ne’ebé menus sei iha mudansa tanba esportasaun kafé aumenta no servisu iha área viajen nian no mós importasaun ba beins no servisu ne’ebé menus.

Presu mina-rai internasionál ne’ebé aas hasa’e reseita mina-rai nian, maski volume produsaun ki’ik, nune’e fó kontribuisaun di’ak ba iha balansu konta atuál.

Relatóriu Ekonómiku Timor-Leste ida ne’e inklui mós análize kona-ba papél agrikultura nian ba redusaun pobreza. Relatóriu ne’e identifika agrikultura hanesan setór xave ida ba redusaun pobreza no diversifikasaun ekonomia-nian, maibé nivel produtividade sei kontinua ki’ik nafatin, nune’e presiza investimentu signifikativu atu fó apoiu hodi hasa’e produsaun.

Jornalista      : Maria Auxiliadora

Editór            : Francisco Simões

HAKEREK NO HATÁN

Please enter your comment!
Please enter your name here