Mapa Timor-Leste ho Illa balun Indonézia nian. Imajen/google

DILI, 12 juñu 2019 (TATOLI) – Reprezentante povu iha Parlamentu Nasionál (PN) hosi Bankada KHUNTO, Antonio Verdial, hateten, asuntu rai iha fronteira, hanesan iha Naktuka entre Timor-Leste ho Indonézia tenke trata liuhosi kanál diplomátiku.

Membru Parlamentu Nasionál Hosi Bankada KHUNTO, António Verdiál.

“Kestaun rai iha fronteira, liga ba nasaun rua, atu solusiona ida ne’e, Estadu Timor-Leste ho Repúblika Indonézia tenke trata liuhosi kanál diplomátiku,”  hateten Deputadu Antonio Verdial, ba jornalista sira, ohin, iha Uma Fukun PN.

Estadu Timor-Leste, hahú hosi IV Governu Konstitusionál kria ona ekipa interministeriál hanesan Ministériu Justisa ho Ministériu Negósiu Estranjeiru, maka trata ona asuntu fronteira ne’ebé atinje ona porsentu 90 resin no hela de’it uitoan atu finaliza.

Governu atuál mós kontinua nafatin hodi trata maske seidauk hetan solusaun porsentu 100, maibé to’o loron ida  sei hetan solusaun final ba asuntu fronteira terrestre entre Timor-Leste ho Indonézia.

Deputadu Antonio Verdial husu ba timoroan sira iha fronteira atu labele buka problema, tenke fiar iha governu, tanba loron ida sei iha solusaun pozitivu.

“Hosi situasaun global agora, hatudu katak Estadu Timor-Leste ho Repúblika Indonézia haree malu di’ak hanesan família ida, entaun ho ida ne’e maka ita hamutuk hodi solusiona asuntu rai iha fronteira,” tenik Antonio Verdial.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here