DILI, 11 juñu 2019 (TATOLI)–Ministériu Justisa liuhusi Diresaun Nasionál Aprovizionamentu hahú loke ona konkursu atu sosa farda ba Guarda Prizionál Becora, Ermera no Munisípiu Covalima nian.
Ministru Justisa interinu atuál Sekretáriu Estadu Terra Propriedade (SETP), Mário Ximenes hateten hahú tinan 2019 nia laran sira sei sosa farda no ekipamentu ba Guarda Prizionál iha item 17 kompostu hosi sapatu, kalsa, kamiza, sapeo no ekipamentu serbisu seluk-tan.
“Agora prosesu ne’e komesa loke ona konkursu tanba governu tau prioridade sei sosa farda hamutuk item 17. Kada guarda sei hetan farda rua hahú hosi sapatu, meias, kalsa, kamiza to’o sapeo,” informa Mário ba jornalista iha Prizaun Becora, Dili, ohin.
Nia hatutan, farda sira ne’e kompañia ne’ebé manán konkursu sei sosa depois to’o mai sei fahe ba guarda hamutuk 200 liu kompostu hosi Becora ema na’in 100 liu, Gleno-Ermera no Covalima nian.
Ministru Justisa interinu ne’e rekoñese katak durante ne’e guarda prizioneiru balun nia farda ho sapatu uza to’o nakles—sira rasik hasai osan ba suku rasik farda no sosa sepatu balun hodi kontinua hala’o serbisu.
Jornalista: Eugénio Pereira
Editór: Xisto Freitas
