Primeiru-Ministru, Taur Matan Ruak, hato’o nia deskursu iha lansamentu “Programa Komemorasaun Tinan 20 Konsulta Populár” no lansamentu “Ezibisaun Eventu Istóriku 1999”. Imajen Tatoli/Egas Cristóvão

DILI, 10 juñu 2019 (TATOLI)—Primeiru-Ministru (PM), ohin, halo lansamentu ba ‘Programa Komemorasaun Tinan 20 Konsulta Populár no Lansamentu Ezibisaun Loron Istóriku 1999’ tanba tinan ida ne’e nu’udar tinan importante ba povu Timor-Leste tomak.

“Tinan ida ne’e nu’udar tinan importante ba Timor-Leste. Timor-Leste kompleta tinan 17 restaura ninia indpendénsia hanesan nasaun soberanu, kompleta tinan 20 halo referendu hodi determina estatutu futuru Timor-Leste nian no mós tinan ida ne’e kompleta tinan 20, primeivez forsa internasionál, INTERFET, sama ain iha Timor-Leste,” dehan Primeiru-Ministru, Taur Matan Ruak, iha ninia deskursu ba Lansamentu Programa Komemorasaun Tinan 20 Konsulta Populár no Lansamentu Ezibisaun Loron Istóriku 1999 iha Antigu Komarka, Balide, Dili, segunda ne’e.

Xefe Governu ne’e hatutan, hahú husi tempu ne’ebá to’o ohin loron, Timor-Leste konsentra nia atensaun iha asuntu rua ne’ebé importante mak hametin pás no estabilidade. Hametin pás no estabilidade iha Timor-Leste ne’e akontese tanba kapasidade timoroan sira bele rekonsilia entre grupu sira pro-independésia no pro-integrasaun. Timor-Leste hametin rekonsiliasaun ho ninia viziñu espesialmente Indonézia ho Austrália ho komunidade internasionál ne’ebé uluk iha Indonézia nia kotuk para okupa Timor durante tinan 24 nia laran.

Konkista ida ne’e, nia hatutan, akontese tanba prinsípiu rua importante ne’ebé Timor-Leste foti hanesan ninia valór ne’ebé orienta ninia komportamentu hotu. Nia dehan, luta Timor nian la’ós hasoru povu Indonézia maibé hasoru rezime Indonésia. Ne’e katak, rezime muda, relasaun normaliza fila fali. Implikasaun mudansa rezime ne’e mak bele fó oprtunidade ba povu Indonézia hetan liberdade no demokrasia no mós Timor-Leste bele sai nasaun independente.

Taur informa, prinsípiu ne’ebé orienta  komportamentu pensamentu estratéjiku Timor nian maka buat hotu ne’ebé la ajuda Timor atu ba oin husik ba kotuk. Realmente, nia tenik, rekonsiliasaun Timor ho Indonézia sai ezemplár tanba laiha inimigu no laiha mundu ne’ebé sai ezemplu ida bele sai hanesan Timor nian.

“Ita haree Estadu Unidu ho Vietname kuandu funu, só to’o tinan 30 mak sira normaliza sira-nia relasaun.  Timor-Leste kontráriu. Fulan rua liu, ha’u ho Xanana Gusmão iha Jakarta hasoru malu ho Wiranto, Prezidente Indonézia no sira hotu, haree malu hanesan amigu. Inimigu iha pasadu maibé amigu iha prezente. Ha’u hanoin Timor kontribui fó lisaun boot ida ba mundu,” nia haktuir.

Hafoin tinan 20 komemora vigésimo aniversáriu referendu no vigésimo aniversáriu loron INTERFET iha próximu setembu, Taur esplika, pás iha Timor iha ain para la’o. Timor-Leste nia estatutu Estadu Direitu Demokrátiku hanesan mós nasaun sira seluk iha mundu, dalaruma di’ak liu fali nasaun balun iha mundu.

Jornalista: Cancio Ximenes

 Editór: Xisto Freitas

HAKEREK NO HATÁN

Please enter your comment!
Please enter your name here