Plenaria Parlamentu Nasionál (PN). Imajen/ António Gonçalves

DILI, 11 juñu 2019 (TATOLI) Parlamentu Nasionál (PN), ohin, fasilita formasaun ba jornalista sira ne’ebé mak destakadu hala’o servisu jornalizmu iha órgaun lejizlativa ne’e.

Alvu hosi formasaun ne’e atu hasa’e koñesimentu jornalista sira nian kona-ba lala’ok no funsionamentu servisu Parlamentu Nasionál nian hanesan órgaun lejizlativu.

Sekretáriu Jerál Parlamentu Nasionál (PN), Adelino Afonso de Jesus,  hateten, nesesáriu duni atu jornalista sira ne’ebé hala’o knar iha Parlamentu Nasionál atu hetan formasaun hodi hatene funsionamentu parlamentu nian.

Nia akresenta, katak formasaun ne’e pertinente ba jornalista sira tantu hosi mídia imprensa nia no eletrónika, atu sira iha koñesimentu ba lala’ok parlamentu nian hodi hakle’an sira nia kapasidade hodi halo kobertura didi’ak kuandu ezerse sira nia funsaun.

Nia espera katak, formasaun ne’e sei la remata ho ida ne’e, maibé sei iha kontinuasaun nafatin atu jornalista sira bele iha abilidade kona-ba órgaun lejizlativu nia servisu, nune’e evita jornalista sira labele hakerek notísia sala.

Iha fatin hanesan, Armando Machado, nu’udar formadór akresenta, formasaun ne’e atu hasa’e kapasidade jornalista sira nian atu bele koñese didi’ak saida maka parlamentu ho nia funsionamentu tuir konstituisaun haruka.

Nia  subliña katak, PN iha nia funsaun tolu importante maka atu kumpre funsaun lejizlativa ka halo lei, funsaun fiskalizasaun ka kontrola ba atividade governu iha administrasaun públiku no atu halo desizaun polítika.

“Jornalista sira ne’ebé destakadu presiza koñese funsionamentu hosi parlamentu nian,” Armando Machado hateten.

“Matéria ne’ebé ha’u lori iha substánsia ne’ebé kolokadu maka funsaun parlamentu tuir konstituisaun define, funsaun halo desizaun polítika no hili titular hosi órgaun sira ne’ebé sai hosi parlamentu, hanesan PDHJ, Konsellu Estadu, Membru Konsellu Superiór Majistratura no Judisiál, hili Komisáriu CAC, Membru Konsellu Nasionál Eleisaun.”

Formasaun ne’e sei realiza durante loron rua, hahú 11 to’o 12 juñu 2019, ne’ebé hetan partisipasaun hosi jornalista timoroan ne’ebé servisu iha mídia imprensa no eletrónika besik na’in 20.

Jornalista      : Zezito Silva

Editór             : Francisco Simões

HAKEREK NO HATÁN

Please enter your comment!
Please enter your name here