Diretór Asisténsia Klínika ONGV, Flavio Brandão. Imajen António Gonçalves

DILI, 11 juñu 2019 (TATOLI) – Diretór Klínika Ospitál Nasionál Guido Valadares (ONGV), Flavio Brandão, hatete médiku espesialista iha ONGV sei menus no parte ospitál hetan difikuldade bainhira sira foti ferias anuál.

“Ospitál Nasionál konsiente tebes, tanba ita nia médiku espesialista seidauk sufisiente no ita sei apoia maka’as hosi Brigada Kubanu ba espesialidade ne’ebé maka ita seidauk iha, liuliu ba médiku espesialista sira hanesan nefrologia (espesialista ba rins), urologia (espesialista ba reprodusaun maskulinu) no seluk tan’’, hatete Flavio ba TATOLI iha nia kna’ar fatin ONGV, ohin.

Tanba ne’e, Flavio dehan sira sempre hasoru difikuldade bainhira médiku Kuba ida feriadu anuál, nune’e afeta tebes atendimentu iha ONGV.

Diretór Klínika ONGV haktuir dala-barak liu área importante sira maioria kobre hosi Brigada Kubanu sira, tan ne’e bainhira sira foti feriadu anuál maka difisil tebes.

“Prekupasaun sira ne’ebé daudaun hosi pasiente sira loos duni akontese, maibé ospitál esforsu nafatin koordena ho Brigada Kubanu sira atu sira nia lisensa anuál nian tenke iha ema balu troka molok fila, situasaun ne’e akontese duni iha fulan kotuk, katak iha médiku balu laiha no nia troka mós seidauk to’o”, afirma Flavio.

Flavio akresenta situasaun ne’e la’ós maioria akontese iha departamentu hotu, tanba balun hanesan; ginekologia (espesialista orgaun femininu), bainhira atu ba foti ferias, sira sempre buka uluk subtituisaun maka foin bele sira foti ferias.

“Ami sempre kontinua hadi’a liuhusi kooperasaun ne’ebé iha entre Brigada ho Ministériu Saúde. Situasaun ne’e la’os akontese bebeik, maibé akontese de’it bainhira sira atu foti ferias. Dala ruma mós asuntu familía katak médiku refere tenke fila ba nia rain, entaun momentu hanesan ne’e maka hasoru situasaun katak médiku espesialista ba área espesifiku, situasaun ne’e kleur liu mak fulan ida”, esklarese.

Atu labele akontese tan situasaun sira ne’e, Flavio dehan nia parte halo ona planu katak bainhira médiku espesilista ida atu ba ferias tenke hatama uluk oráriu no hein subtituisaun to’o maka bele realiza ferias.

Dadaun ne’e Brigada Kubanu ne’ebé hakna’ar án iha ONGV hamutuk 40 resin, espesialista iha área hotu.

Jornalista: Antónia Gusmão

Editora: Rita Almeida

http://www.tatoli.tl/2019/05/mediku-espesialista-estranjeiru-iha-ongv-hamutuk-150/

HAKEREK NO HATÁN

Please enter your comment!
Please enter your name here