Kompetisaun entre jogadór Zebra FC no Porto Taibessi FC atu hadau golu. Imajen Mídia LFA

DILI, 11 juñu 2019 (TATOLI)—Klube Antiga Kapitál Dili ne’ebé koñesidu ho Porto Taibessi, susesu hadau tan pontu 3 hosi ekipa estimadu hosi Munisípiu Baucau, Zebra FC, ho rezultadu golu 2-1 iha jogu kontinuasaun Segunda Divizaun Liga Futeból Amadora (LFA) époka 2019 ne’ebé hala’o iha Kampu Demokrasia, Bairru Formosa, Dili, ohin.

Hosi rezultadu ne’ebé Porto Taibessi hetan, lori kedas ekipa ne’e túr iha zona seguru iha tabela klasifikasaun provizóriu grup A. Enkuantu, armada hosi Sidade Kulugisa kontinua túr iha zona dezpromosaun (degradasi-termu Indonézia). Sei iha oportunidade ba Ekipa Kulugisa ne’e atu halai sees hosi zona dezpromosaun bainhira manán Cacusan iha jogu semana oin.

Golu vitória Porto Taibessi nian hatama hosi jogadór Octavio Mesquita (6) iha minutu 45, Marcelino Fernandes iha  71. Entretantu, golu Zebra hatama hosi Elvis Maximiano (10) iha minutu 14.

Jogu refere dirije hosi árbitru Jaime Gonçalves, juiz liña Romario Tety, Cristovão Alves no árbitru rezerva, Artur Afonso.

Fó hanoin fali katak dadaun ne’e Kablaki provizoriamente lidera tabela klasifikasaun hanesan primeiru lugár ho pontu 10, segundu lugár Aitana FC ho pontu 9, terseiru lugár Porto Taibessi ho pontu 6, kuartu lugár FIEL ho pontu 4, kintu lugár Cacusan ho pontu 1 no sestu lugár Zebra ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here