Sekretáriu Estadu Komunikasaun Sosiál, Merício Juvenal dos Reis 'Akara' hasai foto hamutuk ho oradór nasionál no internasionál iha semináriu internasionál kona-ba Estabelesimentu Institutu Formasaun Jornalista Timor –Leste ho nia enkuadramentu legal, kurríkulu no dezafiu. Imajen Tatoli/ Egas Cristóvão

DILI, 11 juñu 2019 (TATOLI)–Panelista Prezidente Konsellu Imprensa (KI), Virgílio da Silva Guterres konsidera estabelesimentu Institutu Formasaun Jornalista (IFJ) ne’e la’ós de’it importante maibé urjente.

Nia esplika, estabelesimentu IFJ ne’e urjente tanba konsentra iha edukasaun formál no informál no mós edukasaun sívika atu forma karáter jornalista sira nune’e bele elabora notísia tuir padraun jornalístika.

“Ita-nia serbisu atu serbí interese públiku, maibé la’ós ita serbisu lori naran figura públiku balun ninian,” katak Virgílio liuhusi ninia intervensaun bainhira sai panelista ba semináriu internasionál kona-ba Estabelesimentu Institutu Formasaun ba Jornalista (IFJ) iha Suai Room Timor Plaza, ohin.

Tuir eis prezidente AJTL ne’e katak IFJ mós nu’udar instituisaun ida ne’ebé atu transmiti edukasaun ho valór regulasaun ba jornalista sira atu hatene sira nia kna’ar.

“Kuandu ita eduka sidadaun maka’as liu-tan, hau hanoin ita la presiza regulamentu barak atu regula sira. Maibé, kontráriu, kuandu falta edukasaun, konserteza presiza tan regulasaun barak,” nia akresenta.

Nia rekomenda, diskusaun ba IFJ ne’e presiza involve figura importante sira iha área jornalizmu atu fó sira nia opiniaun no mós mídia na’in sira nune’e estabelesimentu instituisaun IFJ ne’e bele iha integridade no kredibilidade aas.

Iha biban hanesan, eis Diretór Lembaga Pers Dr. Soetomo (LPDS) no Jornalista Seniór Ajénsia Notísia ANTARA, Priyambodo RH haktuir, hanesan fundadór ba LPDS, nia sente IFJ importane tanba IFJ forma karáter jornalista para bele sai jornalista ida ne’ebé iha performa di’ak tuir públiku nia ezijénsia.

“Iha ne’e ita haree oinsá atu kria jornalista ne’ebé kompetente iha nia área. Prepara ema ne’ebé atu sai jornalista iha tinan ida ka rua nia laran liuhosi ezame kompeténsia no hasa’e kapasidade,” nia subliña.

Jornalista: Julia Chatarina

Editór: Xisto Freitas

Klik mós notísia iha kraik ne’e atu lee…

Alvu IFJ La’ós De’it Ba Jornalista

 

HAKEREK NO HATÁN

Please enter your comment!
Please enter your name here