Prezidente Komité Orentadór 25 (CO25), Constâncio Conceição Pinto.

DILI, 11 juñu 2019 (TATOLI)Komité Orientadór 25 (KO25) lideradu Constâncio Pinto, sei aprezenta ezbosu dahuluk kona-ba volume partisipasaun juventude nian iha prosesu funu ba konseitu ukun rasik-aan ba governu.

Komité Orentadór 25 estabelese iha VI Governu Konstitusionál, tempu Primeiru-Ministru, Rui Maria de Araújo.

Komité Orientadór 25 ne’e kria liuhosi Rezolusaun Governu 1/2017 no komité refere kompostu hosi organizasaun juventude rezisténsia hamutuk rua-nulu resin-lima (25).

Objetivu KO25 mak halo investigasaun sientífika ne’ebé kle’an kona-ba involvementu joven sira-nian iha luta ba libertasaun nasionál no nia rezultadu ikus mak sei hakerek livru ida kona-ba istória hosi Rezisténsia Timor-Leste nian.

“Komité nia planu fahe ita-nia istória ne’e ba volume 1 to’o volume 6. Hein katak tinan ida ne’e ami aprezenta draft (ezbosu) ida hosi primeiru volume nian. Volume primeiru sei haree liu-ba ideia kona-ba partisipasaun joven sira nian iha konseitu ba ukun rasik-aan dezde 1975 to’o 1978,” Prezidente KO25, Constâncio Pinto, ba Agênsia TATOLI, iha Palásiu Governu, ohin.

Nia dehan, iha tinan ida ne’e, KO25 rekruta ona peskizadór sira hodi halo peskiza no komité prodúz ona metodolojia ba análize.

Hosi volume dahuluk to’o da-neen ne’e, kada volume iha peskizadór prinsipál ida no peskizadór adjuntu na’in-rua.

Prezidente KO25 ne’e esplika, volume hirak seluk haree kona-ba ekonomia iha tempu invazaun, baze apoiu, frente klandestina  ho movimentu sira seluk.

“Ita-nia istória ne’e komplikadu. Ne’e la’ós ba loos mai loos, tanba ema barak hakerek tiha ona istória maibé balun hakerek tuir-nia perspetiva rasik. Agora, ida komité halo ne’e peskiza ho sientífika katak saida mak ko’alia iha livru ida ne’e loos ka lae (revizaun literatura),” Constâncio informa.

Nia dehan, bainhira peskizadór ida lee livru hamosu pergunta, entaun bele hamosu pergunta sira seluk hodi buka-tuir istória ne’ebé ho investigasaun sientífika hafoin hakerek.

Nia salienta, tinan ida ne’e, KO25 hetan orsamentu rihun lima-nulu (dollar rihun 50) hodi intensifíka serbisu.

Serbisu dahuluk ne’ebé KO25 hala’o mak halo sensibilizasaun ba komité ne’e rasik, workshop, revizaun literatura no publika revista mensál. Ba oin, KO25 sei halo peskiza sientífika hodi rekolla informasaun oioin iha territóriu hafoin prodúz livru iha futuru.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here