Prezidente Komité Orentadór 25 (CO25), Constâncio Conceição Pinto.

DILI, 11 juñu 2019 (TATOLI)Komité Orentadór 25(KO25) lideradu Constâncio Pinto, hili konseitu pensamentu neo-umanizmu iha prosesu hakerek istóriu kona-ba partisipasaun juventude nian iha funu ba libertasaun nasionál.

“Importante tebes liga hosi istória ne’e ho pensamentu balun, entaun ami hili konseitu ida naran neo-umanizmu. Pensamentu neo-umanizmu ne’e fó valór ba ema, ba moris. Tanbasá mak ami hili pensamentu neo-umanizmu, tanba iha funu ne’e la’ós de’it impaktu ba ita ema, maibé ba mós ambiente, ba mós ita-nia kultura, ita-nia kultura naksobu, ita-nia uma-lulik sira ema estraga, ita-nia sándalu ema fokit hotu,” Prezidente KO25, Constâncio Pinto, ba Agência TATOLI iha Palásiu Governu, tersa (11/6).

Nia dehan, atu halo konservasaun no prezervasaun ba istória juventude nian tenke hahú hakerek no jerasaun tuir mai bele hatene loloos istória tuir faktu sira.

“Komité hakarak hatuun sasán ho loloos para ita-nia jerasaun agora no jerasaun mai ne’e iha asesu informasaun ne’ebé loos,” tenik Constâncio.

“Sé livru ida la loos no la tuir faktu ne’ebé mak iha tenke halo revizaun, tanba atu hetan faktu ida liuhosi prosesu naruk. Klaru katak aban bainhira livru na’in sira halo justifikasaun, tanba informasaun balun ne’ebé sira hetan ne’e bele mós la loos,” nia salienta.

Nia dehan, karik autór hakarak defende ninia livru tenke mai aprezenta evidénsia ho klaru atu bele fó satisfasaun ba ema ne’ebé preokupa ba livru ne’e nia lejitimidade.

Jornalista: Evaristo Soares Martins

Editór: Xisto Freitas

Lé moos notísia ne’e: http://www.tatoli.tl/2019/06/ko25-sei-aprezenta-ezbosu-partisipasaun-juventude-iha-funu/

HAKEREK NO HATÁN

Please enter your comment!
Please enter your name here