Primeiru-Ministru, Taur Matan Ruak. Imajen Tatoli/Egas Cristóvão

DILI, 10 juñu 2019 (TATOLI)—Primeiru-Ministru lori VIII Governu Konstitusionál nia naran fó onra no gloria ba jornalista sira ne’ebé mate iha Timor-Leste durante halo kobertura ba prosesu referendu ka konsulta populár iha Timor-Leste iha tinan 1999.

“Primeiru lugár hakarak fó parabéns ba imi jornalista-sira. Hakarak relembra imi-nia maluk [jornalista] sira ne’ebé uluk, tinan 20 ba kotuk, mate tanba halo kobertura ba akontesimentu pasadu (prosesu luta ba auto-determinasaun). Ita fó onra no gloria ba sira-nia memória,” dehan Primeiru-Ministru, Taur Matan Ruak, ba jornalista-sira hafoin lansa Programa Komemorasaun Tinan 20 Konsulta Populár no Lansa Ezibisaun Loron Istóriku 1999 iha Antigu Komarka, Balide, Dili, ohin.

Aleinde ida ne’e, Xefe Governu mós fó saudasaun ba jornalista timoroan sira ne’ebé iha tinan 20 nia laran akompaña no halo kobertura ba prosesu dezenvolvimentu nasionál iha Timor-Leste liuhusi área ka parte oioin.

“Ha’u hakarak fó saudasaun ba jornalista timoroan sira ne’ebé iha tinan sanulu resin ka besik tinan rua nulu nia laran, akompaña prosesu tomak iha Timor-Leste iha parte seguransa, ekonomoia, kultura no área hotu-hotu atu dezenvolve Timor,” nia haklaken.

Jornalista sira ne’ebé mate tanba hala’o sira-nia misaun hodi hala’o kobertura ba prosesu referendu 1999 iha Timor-Leste maka jornalista hosi Indonézia, Agus Mulyawan, ne’ebé milísia sira oho iha Lautém-Lospalos, jornalista hosi Olanda, Sander Sthoenes, ne’ebé militár sira oho iha Igreja Becora nia oin no jornalista timoroan ida, Bernadinho Guterres ‘Bedinho’, ne’ebé polísia Indonézia sira oho iha Kuluhun de Baixo-Dili.

Jornalista: Cancio Ximenes

Editór: Xisto Freitas

 

 

 

HAKEREK NO HATÁN

Please enter your comment!
Please enter your name here