Komisáriu Komisaun Funsaun Públika Asuntu Disiplinár, António Freitas

DILI, 11 juñu 2019 (TATOLI)Dezde Komisaun Funsaun Publiku (KFP) eziste to’o agora, estatístika Funsaun Públika rejista funsionáriu públiku (FP) Timor-Leste hamutuk 1.400 mak komete iha kazu irregularidade.

 “Hahú hosi KFP harii mai to’o agora, funsionáriu hamutuk 1.400 mak involve iha kazu irregularidade,” dehan Komisáriu Funsaun Públika Asuntu Disiplinár, António Freitas bainhira vizita fó solidaridade sosiál ba prizioneiru sira iha prizaun Becora, ohin.

Hosi totál kazu ne’e, nia haktuir, KFP prosesu ona kazu balun, seluk fó xamada atensaun atu hadi’a prestasaun serbisu, balun fó suspesaun no balun demiti hosi funsaun.

Kazu sira ne’e, António hatutan, tuir lei Funsaun Públika hahú rekolla eskrita to’o prosesu fó demisaun. Pur-ezemplu, bainhira komete iha kazu represaun ka kazu normál, tuir lei funsaun públika, fó xamada eskrita hodi funsionáriu ne’e hadi’a nia aan tama serbisu tuir oras no respeita regra serbisu tuir lei.

Nia hatutan, entre kazu 1.400 ne’e, barak rezolve ona no sei iha de’it kazu 400 liu mak KFP sei pendente tanba oknum Funsionáriu Públiku uza patrimóniu Estadu partisipa iha Eleisaun Parlamentár 2017 no ba tuir kampaña la husu lisensa ba irárkia sira.

“Kazu 400 mak ami sei pendente hela hanesan prosesu partisipa funsionáriu iha eleisaun jerál prezidensiál no parlamentár no eleisaun antesipada,” nia hateten.

Atu rezolve kazu ne’e, KFP mós koordena inspetór jerál liña ministeriál sira atu alerta ba fusionáriu sira kontinau serbisu no respeita regra serbisu hodi hatudu prestasaun di’ak iha instituisaun Estadu ne’ebé sira serbisu ba.

Komisáriu António afirma, iha tempu badak, KFP sei tau-matan ba instituisaun Estadu balun ne’ebé sira deskonfia mosu mal prátika tentasaun korrupsaun bele mosu.

“Iha asaun balun ami sei halo regirozu teb-tebes. Iha instituisaun balun ami deskonfia mal prátika. Ne’e KFP no instituisaun sira seluk ne’ebé serbisu ba governasaun di’ak sei la permiti buat sira ne’e akontese,” nia  preokupa.

Nia dehan, KFP sei konvida liña ministeriál sira atu redúz kazu irregularidade liuhosi hadi’a atendimentu serbisu ba públiku tuir planu reforma administrativa instituisaun hotu-hotu hodi hetan governasaun di’ak.

Komisáriu dehan, kada fulan no tinan KFP mós sempre prodúz relatóriu serbisu aprezenta ba Gabinete Primeiru-Ministru, Parlamentu Nasionál atu suporta serbisu KFP tuir lei.

Atu selebra loron Funsaun Públika iha 15 jullu ba dala lima (5), António informa, KFP sei konvida Primeiru-Ministru, Taur Matan Ruak, hodi hato’o mensajen alerta ba diretór jerál liña ministeriál no inspetór sira hotu atu iha intendimentu kona-ba irárkia serbisu hodi hadi’a prosesu administrasaun atu evita mal prátika no administrativa.

Entretantu, KPF rasik haruka ona karta ida ba Polísia Nasionál Timor-Leste (PNTL) atu halo kontrolu mós ba karreta Estadu ne’ebé diretór no oknum funsionáriu no kondutór sira uza ba pasiar iha foho iha tempu feriadu.

“Tempu to’o ona labele abuza uza viatura Estadu. Zero toleránsia ba hahalok ida ne’e,” nia alerta.

KFP mós kontinua koordena ho Komisaun Antí Korrupsaun (KAK), Provedór Direitu Umanu no Justisa (PDHJ-sigla portugés), Diresaun Nasionál Patrimóniu Estadu (SNPE) no PNTL atu halo operasaun iha kada semana kontrola patrimóniu Estadu labele uza ba atividade privada.

 

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here