Diretór Ezekutivu Nasionál CDT-TL, Constâncio Conceição Pinto. Imajen TATOLI/Egas Cristovão

DILI, 11 maiu 2019 (TATOLI) — Área deznutrisaun, abilidade no analfabetizmu sai prioridade ba lansamentu Compact Development Team Timor-Leste (CDT-TL).

Iha 25 marsu tinan 2019, Ministériu Reforma Lejizlativa no Asuntu Parlamentár liuhosi Millenium Challenge Corporation (MCC) hosi Estadu Unidu Amérika (EUA), halo lansamentu Compact Development Team Timor-Leste (CDT-TL), iha salaun Auditóriu Laline Larigutu, Komisaun Nasionál Eleisaun (CNE-sigla portugés).

CDT-TL tutela iha Ministériu Reforma Lejizlativa no Asuntu Parlamentár (MRLAP) no lidera Diretór Ezekutivu, Embaixadór Constâncio Pinto, Adjuntu Diretór Ezekutivu, Mariano do Carmo, Espesialista Jestaun Finaseira, Clotilde Mónica Mendonça, Espesialista Jéneru no Inkluzaun Sosiál, Aniceto Guro Berteni Neves, Espesialista Setór Privadu, Nuno do Rosário Trindade no Espesialista Realasaun Públika no Ligasaun Komunidade, José Caetano Guterres.

Governu kria CDT-TL hodi serbisu hamutuk ho Millenium Challenge Corporation (MCC) ho objetivu atu redúz pobreza iha rai ida ne’e liuhosi kresimentu ekonómiku.

Diretór Ezekutivu Nasionál CDT-TL, Constâncio Pinto, haktuir kooperasaun ho MCC atu dezenvolve programa kompaktu iha Timor-Leste liuhosi identifika setór hirak ne’ebé importante ne’ebé tuir planu sei hala’o iha tinan 2020 to’o 2025.

Área tolu ne’ebé sai prioridade mak hanesan stunting (deznutrisaun), abilidade ema-nian no analfabetizmu.

“Área tolu ne’e rezultadu hosi análize ne’ebé hala’o iha VII Governu ninian, entaun iha análize ne’e mak identifika área tolu mak hanesan stunting (deznutrisaun). Stunting ne’e haree ba labarik sira rakitizmu ninian (kondisaun saúde labarik nian ladi’ak), tanba iha Timor-Leste moras ida ne’e persentajen boot tebes. Ne’e relasiona ho nutrisaun, ema-nia asesu ba bee-moos no saneamentu,” Constâncio ba Agência-TATOLI iha Palásiu Governu, ohin.

Nune’e mós skill (abilidade) haree liu-ba kapasidade profisionál katak bele kria serbisu rasik  no serbisu ho kompañia.

“Problema ida mak enumerasaun ho  literasia. Ne’e ita problema boot katak labarik barak mak la hatene halo konta, leitura hanesn lee livru no análize fraku loos. Entaun, ida mak sei haree liliu ba treinamentu ba profesór sira no oinsá edukasaun fó tratamentu di’ak ba labarik sira,” tenik eis governante ne’e.

Eis Ministru Komérsiu Indústria no Ambiente ne’e akresenta, problema ida ne’e la’ós de’it iha edukasaun, maibé mós iha setór justisa.

Diretór Nasionál CDT-TL ne’e fó ezemplu, ambiente komérsiu ninian hodi rezolve rezolusaun konflitu ba atividade komersiál nian seidauk iha, hanesan arbitrajen, presiza lori ba Singapura tanba Timor-Leste laiha Tribunál Arbitrajen.

Nia salienta, atividade komersiál rezolve liuhosi negosiasaun no mediasaun, maibé sei lori ba tribunál, entaun atu hetan solusaun lori tempu naruk tebes.

“Iha kazu balun ita prefere lori ba rezolve iha Singapura. Ami haree katak rezolve problema sira ne’e bele kontribui ba kresimentu ekonomia iha rai-laran, maibé agora CDT ho MCC haree hela entre área tolu ne’e katak setór saida mak prioridade liu. Stunting nian mak avansadu uituan ona, tanba semana oin, ekipa ida mai halo levantamentu estudu viabilidade ba bee no sameamentu iha Dili no mós munisípiu balun,” katak nia.

Tuir nia katak programa hirak ne’e atu la’o di’ak presiza iha kompromisu hosi governu, setór privadu, sosiedade sivíl no parseiru dezenvolvimentu sira iha Timor-Leste.

“Ha’u iha esperansa boot katak bainhira ita konsege fó ona apoiu  ba programa hosi MCC hosi Amérika, bele ona ajuda ita-nia governu ninia programa sira. Klaru katak MCC nia apoia mai ita, labele hein katak rezolve problema ita-nian hotu, lae. Fó kbiit ba governu hodi hala’o di’ak liu-tan programa ne’ebé mak iha,” nia esklarese.

Constâncio hateten, ezisténsia CDT-TL nia mandatu to’o de’it 2020, karik buat hotu la’o looos no la’o ho didi’ak, iha tinan 2020 sei asina tan kontratu entre Timor-Leste ho MCC.

“Bainhira asina akordu kompaktu entre Timor-Leste ho Amérika liuhosi MCC, CDT nia misaun sei hotu iha ne’ebá. Sei hamosu fali entidade foun ida naran Millenium Challenge Accounting (MCA),” dehan Eis Vise Ministru Negósiu Estranjeiru no Kooperasaun ne’e.

Misaun MCC mai Timor-Leste atu aselera prosesu dezenvolvimentu kompaktu Timor-Leste no CDT-TL mak reprezenta governu hodi hala’o programa “Hasa’e Kbiit Ekonomia, Hamenus Kiak”.

 

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here