DILI, 11 juñu 2019 (TATOLI)–Sekretaria Estadu Komunikasaun Sosiál (SEKOMS) liuhosi Sentru Formasaun Téknika iha Komunikasaun (CEFTEC-sigla portugés), realiza semináriu internasionál durante loron ida kona-ba Estabelesimentu Institutu Formasaun ba Jornalista (IFJ), hodi ko’alia kona-ba enkuadramentu legál, kurríkulu no dezafíu sira.
Durante intervensaun, Sekretáriu Estadu Komunikasaun Sosiál, Merício Juvenal dos Reis ‘Akara’ hateten estabelesimentu institutu formasaun ba jornalista sira sai sai mós prioridade Governu Konstitusionál iha área komunikasaun sosiál, tanba ne’e institutu ne’e sei harii ba profisionál komunikasaun sosial sira.
“Alvu ba Institutu Formasaun Jornalizmu ne’e la’ós de’it ba jornalista, maibé media officer iha instituisaun Estadu sira, citizen journalism (komunidade jornalizmu), mídia ONG, mídia akadémiku no sidadaun ne’ebé hakarak sai jornalista profisionál,” nia tenik iha Suai Room Timor Plaza, Dili, tersa ne’e.
Nia esplika, institutu ne’e harii ho objetivu atu hasa’e jornalista sira-nia kapasidade iha mídia no prátika, en-termu hasa’e kualidade produtu jornaliszmu no plataforma mídia.
Akara haklaken, parte treinamentu iha instituisaun ne’e atu dezenvolve instituisaun mídia, hasa’e kapasidade, rekrutamentu formadór, dezenvolve kurríkulu no matéria iha área espesífiku.
Governante ne’e akresenta, institutu treinamentu ne’e sei parseiru ho asosiasaun mídia, mídia ONG, instituisaun Governu, sentru treinamentu sira rai laran no rai li’ur inklui Lembaga Pers Dr. Soetomo (LPDS) Jakarta, Centro Protocolar de Formação Profissional para Jornalistas (CENJOR) Lisboa, Instituto Camões no seluk-tan.
“Espera liuhosi semináriu ne’e bele kria oportunidade di’ak ba ita atu fahe no apriende esperiénsia no kapasidade en-termu lejizlasaun, kurríkulu no kondisaun seluk hodi estabelese institutu ne’e,” nia katak.
Semináriu ne’e rasik atu halibur informasaun nu’udar referénsia hosi atividade relevante sira, kompostu hosi aspetu perspetiva globál ne’ebé relasiona ho interese Estadu ka nasionál, no perspetiva operasionál liuhosi komparasaun nasaun seluk nian kona-ba modelu legál no kurríkulu no dezafíu saida mak tenke hakat-liu (ultrapasa) iha prosesu estabelesimentu no operasionál institutu ne’e.
Nune’e, dokumentu finál hosi rezultadu semináriu internasionál ne’e sei sai nu’udar baze dadus ne’ebé mak importante ba CEFTEC, nu’udar embriaun atu bele halo análize ida no kontestualiza ho Timor-Leste ninia kondisaun kona-ba atu harii institutu formasaun jornalista ne’ebé efisiente no efikás hodi bele garante kualidade no sustentabilidade jornalizmu no dezenvolve institutu ne’e iha nível nasionál no internasionál.
Jornalista: Julia Chatarina
Editór: Xisto Freitas
