Koordenadór Timor-Leste Coalition for Education (TLCE), José Monteiro

DILI, 10 juñu 2019 (TATOLI)Koordenadór Timor-Leste Coalition for Education (TLCE), José Monteiro, hateten inan labele hanoin aat ba bebé ne’ebe hakarak moris no TLCE prontu tulun molok partu.

“Ami hakarak aviza ba inan-feto sira, katak kuandu seidauk iha responsabilidade ka seidauk prontu tau-matan ba bebé, rede edukasaun-TLCE prontu simu sira. Molok partu mós sira bele mai. Ami bele fasilita sira partu, bele taka sira-nia identidade, bebé ami asegura,” Koordenadór TLCE ba Agência TATOLI, iha Palásiu Governu, ohin.

Nia hatutan, inan iha responsabilidade morál kuida kosok-oan. Bainhira sente laiha responsabilidade, bele informa TLCE nia eskritóriu, Caicoli, besik Forum Nasionál ONG Timor Leste (FONGTIL).

“Ami la kondena aktu hanesan ne’e. Ami hakarak uza maneira atu evita situasaun (soe bebé). Maibé, bebé tenke iha ami-nia liman hodi ami fó tratamentu,” José tenik.

Nia informa, ikus-ikus kazu soe bebé akontese kontinua aumenta, tanba ne’e sosiedade hotu-hotu tenke kolabora hamutuk hodi halo prevensaun.

Nia husu inan-feton balun ne’ebé hasoru situasaun ne’e, tenke barani asesgura bebé no bele informa ba ministériu relevante no ONG sira, nune’e bele fasilita partu no halo koordernasaun no TLCE sei koopera ho sentru saúde no Hospital Nacional Guido Valadares (HNGV) atu fó tratamentu ba inan-feton sira inklui bebé.

Koordenadór Rede Edukasaun ne’e esklarese, Ministériu Edukasaun iha papél kria kondisaun hodi integra asuntu sira hanesan ne’e iha kurríkulu nia laran.

“Kurríkulu mós hanorin ona kona-ba disiplina iha sosiedade nia leet. Kestaun soe bebé ne’e liga ba preparasaun—prepara ona ka lae, ema ida ka inan-feton ida atu iha oan,” José subliña.

 

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here