Seminariu Ezekusaun OJE 2019 MOP iha Salaun Reuniaun Mandarin. Imajen Midia MOP

DILI, 10 juñu 2019 (TATOLI) – Iha tinan klaran 2019, Ministériu Obra Públika (MOP) ho alokasaun orsamentu hamutuk millaun $154,839 husi Orsamentu Jerál Estadu (OJE), konsege ezekuta ona millaun $66,560 (porsentu 43), ne’ebé ezekusaun efetivu ba kada ministériu, hahú iha fulan marsu.

Dadus informasaun ne’e revela liu-hosi semináriu ne’ebé realiza husi MOP, foin lais ne’e kona-ba Relatóriu Ezekusaun OJE 2019.

Iha biban ne’e mós fó sai kondisaun ezekusaun ministériu ne’e to’o loron 30 maiu 2019 ne’ebé ho dotasaun orijinál millaun $154,839 konsege ezekuta millaun $66,560 (porsentu 43), obligasaun millaun $13,435 (porsentu 9), kompromisu millaun $37,393 (porsentu 24) no mós balansu millaun $3,450 (porsentu 24).

Diretór Jerál Administrasaun Finansa-MOP, Januário Patrício Barbosa hateten katak mezmu ezekusaun MOP tarde maibé konsege ezekuta ho di’ak.

“Ita halo ezekusaun tarde maibé ita númeru provizóriu iha ezekusaun OJE 2019 hatudu katak, ita iha vontade di’ak, serbisu di’ak iha tinan ida ne’e no bele aumenta tan ita-nia avaliasaun dezempeñu di’ak ba iha finál 2019,” tenik  Diretór Januário Patrício Barbosa iha Salaun Reuniaun MOP, Mandarin, foin lais ne’e.

Nia espera, iha tinan ida ne’e, ezekusaun MOP bele di’ak hodi bele hetan orsamentu boot iha tinan 2020 tuir nesesidade ministériu nian.

Entretantu, iha semináriu ne’e iha mós biban no tempu ba diretór jerál no diretór nasionál sira hodi hato’o sira ninia ezekusaun trimestrál iha OJE 2019 ne’e.

Osan sira ne’e koloka ba saláriu no vensimentu millaun $5,121, bens no servisu millaun $128,457, transferénsia públika millaun $1, kapitál menór millaun $3.401, no kapitál dezenvolvimentu millaun $16,860.

Despeza boot liu ba orsamentu ministériu ne’e iha Diresaun Jerál Eletrisidade ba kategória bens no servisu ho montante millaun $90,898, enkuantu dotasaun ba Diresaun Jerál Agua, Saneamentu no Urbanizasaun hamutuk millaun $12,881.

Orsamentu ba MOP tinan 2019 sa’e kompara ho 2018 ne’ebé ho montante millaun $100,816, ho dotasaun ba saláriu no vensimentu millaun $5,062, bens no servisu millaun $91,946, transferénsia públika $527.000, kapitál menór $250.000 no kapitál dezenvolvimentu millaun $3,031.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here