Sekretáriu Jerál g7+, Helder da Costa. Imajen/ Egas Cristovão

DILI, 10 juñu 2019 (TATOLI)-Prezidente Repúblika, Francisco Guterres Lú Olo, fó apoiu polítika ba organizasaun g7+ ne’ebé lider karizmátiku Kay Rala Xanana Gusmão, mós nu’udar pesoa eminente.

 “Prezidente Repúblika ninia pontu de vista polítiku fó suporta ba organizasaun g7+ tanba organizasaun ne’e hanesan inter-governmental ida ne’ebé iha aspetu multilateralismu  hodi projeta imajen timor nian tanba implementa objetivu dezenvolvimentu sustentavel ne’ebé hala’o iha mundu tomak,” esklarese Sekretáriu Jerál g7+, ohin, bainhira akompaña  hosi Konsellu g7+ no mós Eis Ministru Negósiu Estranjeiru no Defeza Portugal, Luis Amado,  hasoru malu ho Prezidente Repúblika iha Palásiu Prezidensiál, Bairru-Pité, Dili.

Susesu organizasaun g7+ ida maka Timor-Leste no nasaun g7+ konsege sai kampiaun ba objetivu dezenvolvimentu sustentavel iha númeru 16 kona-ba Justisa, Paz no Fortalesimentu Institusionál ne’ebé mundu mós oras ne’e tau iha planu atu hametin pás global.

Durante hasoru malu ho Xefe Estadu, Helder  da Costa ho ekipa, atualiza kona-ba atividade organizasaun no mós planu organizasaun nian sei hala’o reuniaun inter ministeriál ho parseiru dezenvolvimentu sira ne’ebé sei hala’o iha  loron 26 to’o 27  juñu iha Lizboa- Portugal.

Asuntu importante rua maka sei diskute iha reuniaun ne’e maka konsolidasaun organizasaun g7+ iha nivel mundiál ne’ebé oras ne’e koñesidu tanba hetan suporta maka’as hosi Timor-Leste no ida seluk maka planu organizasaun  ba aplikasaun sai membru observadór ONU  ne’ebé tuir planu sei hahú hatama aplikasaun entre fulan jullu to’o dezembru 2019.

Hosi Timor-Leste sei partisipa hosi Ministru Negósiu Estranjeiru no Kooperasaun (MNEK), Deputadu Parlamentu Nasionál na’in 9, inklui Pesoa Eminente g7+,  Xanana Gusmão.

Jornalista      : Agapito dos Santos

Editór            : Francisco Simões

HAKEREK NO HATÁN

Please enter your comment!
Please enter your name here