Plenária Parlamentu Nasionál. Imajen/António Gonçalves

DILI, 10 juñu 2019 (TATOLI)  Parlamentu Nasionál liuhosi sesaun plenária, ohin, halo levantamentu imunidade ba Deputadu Arão Noe de Jesus ho Deputadu Francisco Miranda Branco, hodi bele ba presta deklarasaun nu’udar sasin ka testemuña iha Tribunal Distritál Dili (TDD) kona-ba kazu laptop rua ne’ebé at iha tinan 2011.

Deputadu Arão Noe de Jesus Amaral, atual Prezidente PN. Imajen/Egas Cristovão

Levantamentu imunidade ne’e ho nia rezultadu votasaun ba Deputadu Arão Noe de Jesus Amaral, afavór 52, kontra ida no abstensaun zero. Enkuantu, Deputadu Francisco Miranda Branco ho votu afavór 50, kontra tolu no abstensaun zero.

Vise Prezidente Komisaun A Parlamentu Nasionál ne’ebé trata asuntu Konstitusionál no Justisa, Francisco de Vasconselhos, hateten, Deputadu Francisco Miranda Branco ho Deputadu Arão Noe de Jesus, sei ba presta deklarasaun iha audiénsia julgamentu iha Tribunál Distritál Dili (TDD), 17 juñu 2019, tan kazu laptop iha Parlamentu Nasionál (PN) iha tinan 2011 nian.

“Parlamentu Nasionál fó autorizasaun ba deputadu na’in rua, hanesan Francisco Miranda Branco ho Arão Noe de Jesus, atu ba presta deklarasaun iha audiénsia julgamentu iha Tribunal Distritál Dili, 17 juñu agora,” konfirma Deputadu Francisco de Vasconselhos, ne’ebé lee sai karta notifikasaun TDD, iha plenária PN.

Deputadu, Francisco Miranda Branco. Imajen/espesiál

Francisco hateten, PN simu karta notifikasaun hosi TDD iha 29 Abríl 2019, atu parlamentu fó autorizasaun ba Deputadu Arão Noe ho Francisco Branco atu sai hanesan testemuña ba laptop ne’ebé deskonfia funsionáriu PN nian ne’ebé maka halo keixa.

Tuir nia kronolojia ba kazu, katak iha 2011, deputadu na’in rua nia laptop at no entrega ba parte lojístika atu hadi’a, depois parte lojístika dehan laptop sira ne’e at ona no ikus mai sira na’in rua maka sai fali testemuña tan funsionáriu balun ne’ebé sai arguido.

Iha fatin hanesan, Deputadu Arão Noe prontu koopera ho parte justisa atu sai testemuña ba prosesu judisiál tan kazu laptop ne’e akontese iha 2011 nian ne’ebé kona funsionáriu PN.

“Ami ba tribunal hanesan testemuña, tanba tuir estatutu deputadu mós hateten katak deputadu labele tuir julgamentu kuandu la iha autorizasaun hosi parlamentu,”  esplika Deputadu Arão Noe de Jesus Amaral.

“Ha’u ba hanesan deputadu, la’ós Prezidente Parlamentu Nasionál, tanba kazu ne’e iha 2011 nian,” afirma Deputadu Arão Noe de Jesus Amaral, atuál Prezidente Parlamentu Nasionál.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here