Prezidente PD, Mariano Assanami Sabino. Imajen/Egas Cristovão

DILI, 10 juñu 2019 (TATOLI) – Asaun eroiku iha Dili durante tempu luta, hanesan levantamentu Fatunaba, Becora no Marabia, nu’udar kontribuisaun boot no signifikativu ba defende luta libertasaun nasionál. Tanba ne’e, Partidu Demokrátiku (PD) husu ba Estadu atu haloot restu mortais hosi masakre Marabia iha Jardim Eroi Metinaro.

Liuhosi sesaun plenária Parlamentu Nasionál, ohin, Vise Xefe Bankada PD nu’udar mós Prezidente PD, Mariano Assanami Sabino, fó hanoin kona-ba loron ohin, 10 juñu 2019, nu’udar loron movimentu Marabia iha loron 10 juñu 1980.

Mariano Assanami husu ba Estadu atu konsidera ba hirak ne’ebé la iha ona hodi bele haloot ba iha Jardín Eroi atu fó omenajen nafatin no respeitu nafatin sira ne’ebé maka sei moris atu iha responsabilidade nu’udar veteranu.

“Partidu Demokrátiku hakarak fó omenajen kle’an ba eroi funu na’in sira, espesiál ba loron ohin, hanesan loron ba movimentu Marabia. Husu atu Estadu konsidera hodi haloot iha jardín eroi,” afirma Mariano Assanami.

Marabia hanesan fatin ida nia naran ne’ebé lokaliza iha Suku Lahane Oriental, Dili. Fatin ne’e koñesidu ba prosesu luta libertasaun patria, ka iha tinan barak liu kotuk akontesimentu importante iha Dili ne’ebé koñesidu ho akontesimentu Marabia.

Marabia nu’udar símbolu hodi reprezenta movimentu ba asaun istóriku tanba iha fatin barak akontese asaun eroiku hanesan iha Dare, Fatunaba, Becora no Marabia rasik.

Mariano Assanami mós fo hanoin kona-ba loron 12 juñu hanesan mós loron importante ba movimentu estudantíl sira ne’ebé luta mós ba independénsia Timor-Leste iha rai laran no Indonézia.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here