Símoblu Partidu Demokrátiku.

DILI, 10 juñu 2019 (TATOLI)– Partidu Demokrátiku (PD) ne’ebé lidera hosi Mariano Assanami Sabino ho Antonio da Conceição “Kalohan”, ohin, tuir loloos selebra sira nia aniversáriu ba da-XVIII (10 juñu 2001-10 juñu 2019), maibé lideransa sira ho estrutura tomak deside adia hikas ba loron 22 juñu, tinan ne’e, tanba membru estrutura balun sei halo hela viajen ba rai li’ur.

Prezidente PD, Mariano Assanami Sabino. Imajen/ TATOLI

“Konvida ba hothotu katak selebrasaun ba loron PD la halo iha 10 juñu tanba deputadu ida hala’o misaun iha li’ur no sei adia ba fali loron 22 juñu, ne’ebé sei selebra iha postu administrativu hotu-hotu,”  informa Prezidente PD, Mariano Assanami Sabino, através plenária Parlamentu Nasionál.

Mariano Assanami hateten, ohin, loron moris PD nian no ohin PD nia loron ba dala 18, ne’ebé valoriza nafatin valor demokrátiku hodi kontinua la’o ba oin.

Iha selebrasaun aniversáriu PD nian ne’e sei marka misa agradesimentu no tau ai-funan ba eroi sira tanba jerasaun foun kaer sira nia prinsípiu, sira nia hakarak ne’ebé sira proklama. Ai-funan sei ba tau iha jardín eroi, santa krús iha fatin ne’ebé de’it tanba ema balun harii PD maibé ohin la hamutuk ho PD inklui saudozu Fernando Lasama de Araújo.

Assanami hatete, PD apresia ba partidu hotu-hotu hanesan FRETILIN, CNRT, KHUNTO, PLP, PUDD no partidu hirak seluk iha parlamentu no kolega sira ne’ebé fó parabéns ba loron liuhosi mídia sosiál.

“Ami hakarak apresia imi hotu no imi hotu nia kooperasaun ba ezisténsia PD, dezde 2001 to’o ohin loron, valor demokrátiku ne’ebé PD defende ohin kontinua la’o ba oin,” afirma Mariano Assanami.

Assanami hatutan, PD komunga filozofia “Harii Nasaun hosi Baze” ho hanoin katak dezenvolvimentu tenke hanesan ba fatin hotu, iha ne’ebé de’it maubere iha, iha dezenvolvimentu iha ne’ebá no tenke dignifika povu maubere tomak.

 “Ha’u nia dignidade la aas liu dignidade Estadu nian, ita hotu tenke sakrifika ba rai ida ne’e, labele husik ba povu ne’e sakrifika dala ida tan. Povu fó ona nia oan, la’en, feen atu rai ne’e ukun-an. Ohin, polítiku sira halo polítika atu dignifika sira nia moris iha nasaun ne’e,” hateten Mariano Assanami.

PD apresia tan ba hirak ne’ebé kontribui ba partidu ne’e eziste maske balun ba fali partidu seluk, maibé ba jerasaun foun sira katak, uluk PD kadeira ualu maibé agora tun ba lima maibé husu nafatin ba timoroan hotu atu apoiu PD nia ezisténsia.

Loron PD nian, loke liman ba hothotu, sira ne’ebé luta ba partidu, luta ba valor demokrasia, atu lisan demokrasia sai lisan ba ukun, lisan ba moris, PD nia odamatan nakloke ba imi.

Iha fatin hanesan prezidente Bankada CNRT, Duarte Nunes, fó parabéns ba PD ne’ebé selebra nia loron moris no CNRT espera katak jerasaun foun bele hatudu nia kapasidade atu lori nasaun ne’e ba oin.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here