Pesoál saúde sira tuir formasaun lideransa ba jestaun iha salaun ONGV. Imagen Jogerjo Guterres.

DILI, 10 juñu 2019 (TATOLI) – Diretór Nasionál ba Saúde Públika, Pedro Canisio, hatete diretór klínika, diretór sentru saúde no xefe departamentu, partisipa formasaun jestaun ba lideransa saúde ho objetivu hasa’e kualidade atendimentu iha públiku.

“Ko’alia kona ba jestór ne’e nia atu servisu di’ak ka lae, rezultadu di’ak ka lae fatór barak maka tenke konsidera, primeiru ko’alia kona-ba rekursu umanu, finansa, apoia lojístika. Rekursu umanu ema hothotu ho nia karater la-hanesan, bainhira jestór ne’e halo gia maibé ema ne’ebé implementa ne’e maka dala ruma seidauk másimu, ida ne’e afeta ba rezultadu atendimentu”, hateten Pedro Canisio da Costa Amaral ba jornalista sira iha salaun Ospitál Nasionál Guido Valadares (ONGV), ohin.

Nia dehan formasaun ne’e durasaun kleur, tanba inklui ho prátika maka hasoru dezafiu sei diskute hamutuk no buka solusaun, nune’e sei kontinua to’o fulan sia.

Pedro subliña treinamentu ne’e mós atu haree mós ba kualidade servisu parteira sira nian, étika profisionál pesoál saúde, maske treinamentu nafatin fó, no lideransa orienta loos ona, maibé étika atendimentu ema ida-idak nian fila fali ba ida-idak nia an. Maibé nu’udar lideransa tenke iha nafatin obrigasaun atu konvense funsionáriu sira para servisu ho di’ak.

“Durante ne’e ha’u haree katak la’ós laiha liu kedas mudansa, iha mudansa, maibé ha’u bele dehan atu muda ema nia hahalok labele muda dala ida de’it, muda neineik, mas halo beibeik, liu hosi formasaun ba pesoál saúde”, katak tan.

Iha fatin hanesan, Diretór Ezekutivu Ospitál Referral Suai, Bernadino Armando da Silva, hateten treinamentu ne’e bele hasa’e koñesimentu hodi fó atendimentu kualidade ba pasiente.

“Kontente tebes ho formasaun ne’e, tanba relasaun tebes ho ami nia servisu loron-loron, no liuhusi treinamentu ne’e atu hasa’e liután ami nia kapasidade hodi fó atendimentu di’ak ba pasiente sira”, haktuir.

Durante loron lima, nia dehan tan sei hetan buat barak hodi sai hanesan bukae hodi implementa iha servisu loroloron, tanba la’ós de’it teoria maibé mós sei prátika.

Tuir Bernadino atendimentu profisionál saúde nian seidauk hatuur vontade di’ak, liuliu relasaun di’ak ho pasiente sira, dala ruma fó atendimentu ho liafuan la mamar.

“Kualidade atendimentu presiza hadi’a duni, tanba ne’e liuhusi formasaun sira ne’e ami nu’udar lideransa sei ba transmite fali ba ami profisionál saúde sira hodi kumpre”, afirma Bernadino.

Formadór durante treinamentu hosi Austrália no apoia hosi Fundasaun São João de Deus.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here