Segundu Komandante Polísia Munisípiu Dili, Superintendente Asistente Polísia, Euclides Belo

DILI, 10 juñu 2019 (TATOLI)—Komandu Polísia Munisípiu Dili indentifika ona autór na’in 10 maka involve iha kazu konfrontu tuda malu entre juventude grupu rua hodi rezulta karreta rua no motór ida hetan estragu.

Komandante Interinu Polísia Munisípiu Dili, Superintendente Asistente Polísia, Euclides Belo dehan konfrontu tuda malu entre joven iha Bar Benfica Dili akontese iha domingu  (09/06) tuku tolu madrugada kauza hosi joven sira hemu tua lanu maka’as halo ba joven balun iha Bar Benfica.

Euclides dehan, akontesimentu ne’e la rezulta ema ruma mate no kanek, maibé karreta rua inklui motór Kawasaki ida no sasán balun hosi Bar Benfica nian hetan estragu.

Nia haktuir, hafoin akontesimentu, PNTL to’o kedas iha fatin akontesementu hodi hakalma situasaun no polísia foti kedas dadus vítima na’in 20 hodi fó informasaun katak iha grupu joven dezkoñesidu na’in 10 maka halo uluk asaltu tuda malu iha Benfica oin to’o Muzeu Rezisténsia nian.

“Ami rekolla dadus hosi vítima 22 haktuir katak grupu joven 10 mak halo uluk asaltu  hodi estraga karreta rua no motór ida,” dehan  Komandante Euclides ba jornalista iha Komandu Munisípiu Caicoli, Dili, ohin.

Nia dehan, agora dadaun ekipa PNTL kontinua halo investigasaun kle’an, tanba vítima 22 sira rasik mós lamenta no hakarak lori prosesu ne’e ba justisa.

Euclides salienta, autór na’in 10 ne’ebé halo problema sira-nia naran tama ona iha lista PNTL hodi hein prosesu para bele buka tuir sira.

Tuir lei, nia esplika, bainhira ema ruma halo asaltu no estraga ema-nia sasán nu’udar krimi ne’ebé sei prosesa tuir lei bazeia ba dadus iha fatin akontesimentu.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here