Evidensia droga ne'ebé Servisu Alfándega Atambua rekolla husi suspeitu kazál timoroan. Imajen/Dok.Polísia Atambua

DILI, 10 juñu 2019 (TATOLI)-Governu Timor-Leste ne’ebé lidera hosi Primeiru-Ministru, Taur Matan Ruak, sei halo esforsu hodi ko’alia ho Governu Indonézia atu trata kazál Timor oan ne’ebé autoridade Indonézia prende tanba lori droga.

Iha loron 20 maiu 2019,  autoridade servisu Alfándega prende kazál timoroan iha Fronteira Mota Ain, Belu, Timor Osidentál, tanba lori droga hosi Timor-Leste atu ba fa’an iha Provínsia Kupaun-Indonézia

Primeiru-Ministru, Taur Matan Ruak. Imajen/Egas Cristovão

Primeiru-Ministru, Taur Matan Ruak, aprofunda katak,  presiza atu haree polítika estradisaun ne’e bainhira  hakarak lori fila kazál  Timoroan  ne’e.

“Ita laiha akordu estradisaun ho Indonézia, karik ita hakarak lori fila sira mai entaun ita tenke iha akordu ida tanba Indonézia labele foti fó de’it, tanba ne’e ita haree evolusaun ne’e lao oinsá,” esplika Primeiru-Ministru Taur Matan Ruak, hodi responde jornalista hafoin halo enkontru ho Prezidente Repúblika, Francisco Guterres Lú OLo, ohin, iha Palásiu Prezidensiál, Bairru-Pité, Dili.

Maske, Governu seidauk foti desizaun serteza ba kazu ne’e, maibé Primeiru-Ministru promete sei kontinua akompaña prosesu ne’e tuir legalidade tanba Timor-Leste adopta Estadu Diretu Demokrátiku.

“Ami mós haree prosesu saida maka ita tenke hakat tanba la’ós fasil kuandu ita iha ona kazu ida,” hateten Primeiru-Ministru Taur Matan Ruak.

Jornalista      : Agapito dos Santos

Editór            : Francisco Simões

HAKEREK NO HATÁN

Please enter your comment!
Please enter your name here