Governu liuhusi Vise Ministra Saúde Asuntu Kuidadu Saúde Primária, Élia António de Araújo dos Reis Amaral, kua fita ho sinál lansa programa imunizasaun ba labarik sira hodi komemora loron nasionál saúde ne’ebé sei akontese iha loron 22 jullu fulan-oin. Imajen Jogerjo Guterres

DILI, 10 juñu 2019 (TATOLI) – Governu liuhusi Ministériu Saúde (MS) lansa programa imunizasaun ba labarik sira hodi komemora loron nasionál saúde ne’ebé sei akontese iha loron 22 jullu fulan-oin.

Programa ne’e lansa iha Sentru Saúde Komoro hosi Vise Ministra Saúde Asuntu Kuidadu Saúde Primária, Élia António de Araújo dos Reis Amaral, akompaña hosi profisionál saúde sira.

“Saúde nu’udar kondisaun importante atu fasilita prosesu dezenvolvimentu nasaun, tanba ho kondisaun saúde ne’ebé di’ak mak bele garante kualidade rekursu umanu ida ne’ebé kualifikadu iha area oi-oin hodi favorese ba aumentu iha produtividade kada sidadaun”, Élia António de Araújo dos Reis Amaral hateten iha serimónia lansamentu iha Sentru Saúde Komoro, ohin.

Élia hatutan nasaun ida atu iha progresu presiza xave tolu mak rekursu umanu, kapitál no naturál.

Afirma tan saúde hamutuk ho edukasaun mak fundamentál atu eleva produtividade rekursu umanu, nune’e bele hadi’a nivel kompetitividade ekonomia nasaun nian. Saúde iha relasaun direita ho nivel edukasaun nasionál. Ho kondisaun saudavel, estudante sira bele iha kapasidade kognitiva ne’ebé di’ak atu aprende iha eskola sira.

Responsavel másima realsa ministériu saúde ho nia estrutura tomak hahú hosi nivel nasionál to’o baze iha responsabilidade boot atu garante asesu servisu saúde ida ne’ebé asesivel no kualidade ba timór-oan tomak.

Timór-Leste nia sistema nasionál saúde ohin loron garante aspetu hanesan estabelesimentu fasilidade saúde iha maiór parte husi territóriu, disponibilidade profisionál saúde kualifikadu, dezeña programa saúde barak ho baze implementasaun direita ba komunidade, garante sistema referénsia ida ne’ebé liga atensaun primária ba atensaun sekundária ba leten,  no esforsa án nafatin atu alínea dezenvolvimentu setór saúde ho meta globál.

“Hanesan nasaun ho nia rendimentu médiu baixu, ita nia dezenvolvimentu área saúde tuir hela espetativa, mezmu nune’e, ita konsente katak sei iha buat barak mak ita presiza halo atu hadi’ak liu tan iha futuru oin mai. Durante fulan ida nia laran hahú 10 juñu 2019 to’o 22 jullu 2019, Ministériu Saúde sei realiza atividade oi-oin hodi komemora loron nasionál saúde”, dehan Élia.

Atividade sira ne’ebé sei hala’o maka; konsulta espesializada ba moras krónika sira, hala’o konsulta, divulga moras oi-oin, atividade doasaun ran, interkámbiu no talk show. Atividade hirak ne’e sei realiza tantu iha nasionál no munisipál.

“Imunizasaun nu’udar protetór ba populasaun infantíl sira, benefísiu barak ne’ebé indivíduu no komunidade bele hetan husi vasinasaun”.

Nia akresenta vasina bele salva vida, kombate moras oi-oin, inklui kontrola, elimina no erradika moras.

Timor Leste konsege hetan rezultadu pozitivu balun tanba ministériu saúde nia esforsu iha imunizasaun durante tinan 17 nia laran. Ohin loron nasaun livre ona husi moras polio, elimina ona transmisaun moras tetanus husi inan ba oan, elimina ona moras sarampu no kontrola ona moras rubella.

Halo mós kontrola ba moras da’et sira seluk, ne’e hotu posivel tanba fó importánsia imunizasaun ba labarik sira hodi proteje komunidade husi moras ne’ebé da’et.

“Governu nia kobertura imunizasaun totál kada tinan atinje porsentu 85 to’o 87. Ita hakarak kobertura sa’e to’o porsentu 90 ate 95, nune’e bele garante protesaun ba ita nia labarik no komunidade hotu”, katak tan.

“Tanba ne’e ha’u apelu ba komunidade atu asegura ita nia labarik sira hetan imunizasaun ne’ebé kompletu tuir eskema nasionál imunizasaun iha ita nia nasaun. Ha’u enkoraja nafatin ita nia profisionál saúde tomak atu maximiza liután ita nia esforsu hodi asegura kobertura imunizasaun ne’ebé kompletu ba komunidade”.

Biban ne’e, Élia mós agradese ba parseiru sira nia kontribuisaun hanesan Organizasaun Mundiál ba Saúde (OMS), Fundu hosi Nasaun Naklibur ba Labarik Sira (UNICEF-sigla inglés), Fundu hosi Nasaun Naklibur ba Populasaun (UNFPA-sigla inglés), Programa Nasaun Naklibur sira ba Dezenvolvimentu (PNUD-sigla portugés), Marie Stopes Timor-Leste (MSTL), sosiedade sivíl no organizasaun hotu ne’ebé kontribui ba progresu no dezenvolvimentu setór saúde iha Timor-Leste.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here