Diretór Diresaun Nasionál Seguransa Rodoviária (DNSR), Superintendente Asistente Polísia Ismael da Costa Babo

DILI, 10 juñu 2019 (TATOLI)Sekretaria Estadu Protesaun Sivíl liuhusi Diresaun Jerál Serbisu Operasionál (DJSO) kontinua hala’o formasaun kontinuasaun ba funsionáriu protesaun sivíl inklui membru polísia no F-FDTL no mós funsionáriu ambulánsia sira kona-ba Sistema Jestaun ba Insidente  ka Incident Command System (ICS).

Formasaun ne’ebé hala’o bazeia ba kooperasaun entre Sekretaria Estadu Protesaun Sivíl, International Organization for Migration (IOM) no ekipa  USAID Timor-Leste.

“Formasaun ne’e realiza tanba koopera ho fasilitadór IOM no USAID liuhosi ekipa  serbisu floresta Amerikanu nian mai fó formasaun kona-ba Sistema Jestaun ba Insidente oinsá funsionáriu sira bele halo atendimentu ba situasaun emerjénsia liliu salva vítima sira hosi dezastre naturál bainhira akontese iha Timor-Leste,” Diretór Jerál Serbisu Operesionál no Protesaun Sivíl (DJ-SOPS), Superintendente Asistente Polísia, Ismael da Costa Babo informa ba jornalista sira iha Kampaun Organizasaun Nasaun Unida (ONU), Caicoli, Dili, ohin.

Nia tenik formasaun ne’e importante tebes tanba hasa’e funsionáriu sira-nia kapasidade para to’o tempu ruma sira foti desizaun di’ak hodi responde ba dezastre naturál ne’ebé akontese.

Ismail hatutan, ohin loron problema boot liu ne’ebé mundu hasoru mak problema dezastre naturál, problema dezastre teknolojia no dezastre aviaun monu, tan ne’e Timor-Leste presiza prepara kondisaun liuhosi kapasitasaun rekursu umanu (funsionáriu) hodi prepara-án labele rende ba dezastre sira ne’e.

Tuir nia katak formasaun ne’e bele kria mós relasaun emosionál entre partisipante sira bele iha espíritu nasionalizmu hodi serbisu hamutuk nu’udar ekipa ida forte no prepara responde ba kualkér dezastre.

Iha Timor-Leste, nia haktuir, fatin sira ne’ebé risku ba dezastre akontese maka uma komunidade ne’ebé harii besik mota ninin inklui iha foho leten tanba rai rai bele monu bainhira akontese udan no anin boot.

Entretantu, formasaun ne’e fahe mós informasaun importante ba partisipante ajente protesaun sivíl, polísia no F-FDTL oinsá hamutuk halo sosializasaun maka’as ba komunidade iha área rurál atu labele tesi ai  arbiru no sunu rai tanba estraga ambiente.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here