Tabela klasifikasaun Segunda Divizaun LFA époka 2019.

DILI, 10 juñu 2019 (TATOLI)—Dadaun ne’e, ekipa estimadu hosi Munisípiu Manufahi, Kablaki FC, nia ain sorin tama ona iha odamatan Primeira Divizaun hafoin hurlele klube Cacusan FC ho rezultadu 4-2 iha jogu kontinuasaun Liga Futeból Amadora (LFA) époka 2019 grup (A) ne’ebé hala’o iha Kampu Demokrasia, Bairru Formosa, ohin loraik tuku 16:00 otl.

Maski nune’e, Aitana mós iha oportunidade pomove ba Primeira Divizaun. Atu determina loloos ekipa rua nia destiñu bainhira jogu Aitana Vs Fitun Estudante Lorosa’e (FIEL) ramata iha loron hira tan tuir mai. Aitana tenke manán FIEL hafoin Aitana bele hadau malu ho Kablaki iha finál ne’ebé sei hala’o iha semana oin.

Golu ne’ebé lori Kablaki FC túr iha Kablaki tutun hatama hosi jogadór Inoc Bidana (7) iha minutu 32, Silvestre Gama(18) iha minutu 53, 57, Fretelino de Jesus (14) iha minutu 72. Enkuantu, golu Cacusan nian hatama hosi Jerónimo Freitas (30) iha minutu 45 no Adino Tilman (94) iha minutu 84.

Jogu dirije hosi árbitru Nívio Fernandes, juiz liña António Carvalho, Elísio Lopez no árbitru rezerva, Francisco Fatih.

Hosi rezultadu ne’e lori mós Kablaki provizoriamente lidera tabela klasifikasaun primeiru lugár ho pontu 10, segundu lugár Aitana FC ho pontu 9, terseiru lugár FIEL ho pontu 4, kuartu lugár Porto Taibessi ho pontu 4 (FIEL ho Porto Taibessi pontu hanesan maibé diferente golu), kintu lugár Cacusan ho pontu 1, sestu lugár Zebra ho pontu zero.

Hosi pontu ne’ebé iha hatudu momoos katak Kablaki ho Aitana kandidatu forte ba Primeira Divizaun. Entretantu, Cacusan ho Zebra kandidatu forte ba dezpromosaun. FIEL no Porto Taibessi mantein iha zona seguru.

Jogu tuir mai, Zebra sei hasoru Porto Taibessi  iha aban (11 juñu 2019), FIEL hasoru Aitana FC iha 14 juñu, Zebra sei hasoru fali Cacusan iha 26 juñu.

Hafoin jogu ramata, ba jornalista sira, treinadór Kablaki FC, Romão Guterres, sente kontente tanba vitória ne’ebé sira hetan loke dalan ba Kablaki promove-án ba Primeira Divizaun.

“Ami kontente tebes. Jogu ida ohin importante loos mai ami nune’e iha jogu tuir mai ami ho Aitana bele hadau malu ba Primeira Divizaun. Agora ne’e, ami iha loos ona zona seguru. Tinan kotuk ne’e, ami tún tiha ba zona degradasaun maibé ohin ami hadér hikas fali,” tenik Romão.

Iha jogu final hasoru Aitana maski todan maibé Romão la pesimista maibé jogu minutu 90 mak sei determina.

Iha sorin seluk, treinadór Cacusan FC, Domingos Soares konfesa sente triste ba derrota ne’ebé nia ekipa hetan maibé iha jogu tuir mai hasoru Zebra nia garante sei manán nune’e bele hadau labele tun ba zona dezpromosaun.

“Ami sente triste tebes, maibé ami sei iha tan oportunidade ida atu joga ho Zebra nune’e ami manán bele mantein iha zona seguru,” nia tenik.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here