Kontra atake entre jogadór FC Lero no DIT FC. Imajen Mídia LFA

DILI, 09 juñu 2019 (TATOLI)—Avansadu FC Lero, Anizio Correia, susesu lori nia ekipa fahe pontu ho DIT FC liuhosi golu impata 3-3 iha jogu kontinuasaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, ohin tuku 16:00 otl.

Golu ne’ebé lori Lero fahe pontu ho DIT marka hosi jogadór Anizio Correia (10) iha minutu 30, 67, 71. Enkuantu, golu DIT marka hosi jogadór Lourenço Ximenes iha minutu 26, 28 no Orcelio da Silva iha minutu 42.

Jogu refere lidera hosi árbitru Pedro Carvalho, juiz liña Filomeno da Silva, Jovanio Reis no árbitru rezerva, Salvador Cabral.

Tanba empata ho DIT, treinadór Lero João Baptista hateten, nia sente kontente tanba nia ekipa susesu fahe pontu hanesan ho DIT.

“Ami sente kontente tebes. Loloos ne’e ami labele manán DIT tanba sira ekipa ne’ebé sa’e ona ba Primeira Divizaun mak tún fali ne’e maka’as no esperiénsia barak. Ami kontente tanba ami ekipa ne’ebé bele dehan fraku maibé bele duni,” tenik João hafoin jogu ramata.

Treinadór ne’e hatutan, rezultadu ne’ebé iha lori Lero bele hadau malu ba Primeira Divizaun tanba sei hela jogu rua no pontu entre ekipa hirak ne’ebé hamahon-án iha grup (B) ladún dook malu.

“Ami sei iha jogu rua. Tan ne’e, ami sei iha oportunidade tanba ita haree pontu la dook malu,” tenik João.

Entretantu, treinadór DIT FC, Francisco da Costa konfesa katak empata ne’ebé nia ekipa hetan tanba falla mai hosi sira rasik, katak konsidera klube seluk la vale tanba ne’e mak halo DIT falla hadau pontu tolu.

“Jogu ohin ne’e konta dehan ami manán loos tia ona, tanba ami lidera ona iha primeira parte. Ami konsidera ekipa adversáriu la vale (anggap remeh-termu Indonézia) ne’e mak halo ami impata,” dehan Francisco.

Maski la konsege gaña pontu tolu tuir DIT nia mehi maibé treinadór ne’e optimista nafatin hakarak lakohi tinan ne’e tenke fila hikas ba Primeira Divizaun. “Bele halo nusa mós ami tenke fila hikas ba Primeira Divizaun,” nia promete.

Tabela klasifikasaun provizóriu kontinua lidera hosi DIT FC ho pontu 7, segundu lugár Lika-Lika ho pontu 6, terseiru lugár Sporting de Timor ho pontu 4, kuartu lugár FC Lero ho pontu 4, kintu Lugár Nagardjo ho pontu 4 (Sporting, Lero no Nagardjo pontu hanesan maibe diferente golu), sestu lugár Santa Cruz ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here