Jogadór Lika-Lika Lemorai FC espresa sentimentu orgullu hafoin manán ekipa Sporting de Timor ho golu 3-2. Imajen Mídia LFA

DILI, 08 juñu 2019 (TATOLI)—Klube estimadu hosi Munisípiu Viqueque, Lika-Lika Lemorai FC, manán mihis klube Sporting de Timor ho golu 3-2.

Lika-Lika atinje susesu ida ne’e iha jogu kontinusasun Segunda Divizaun Liga Futeból Amadora (LFA) époka 2019 ne’ebé mak hala’o iha Estádiu Munisipál Dili, ohin tuku 16:00 otl.

Golu ne’ebé lori Lika-Lika ba vitória atribui hosi jogadór Anibal Mesquita iha minutu 37, Manuel da Silva iha minutu 48 no Andre Sarmento iha minutu 68. Enkuantu, golu Sporting nian hatama hosi Marito dos Santos iha minutu 20 no Herminio Sousa iha minutu 89.

Jogu refere lidera hosi árbitru Jaime Gonçalves, juiz liña António de Carvalho, Elísio Lopez no árbitru rezerva, Pedro Carvalho.

Maski manán Sporting maibé DIT FC kontinua túr hanesan primeiru lugár iha tabela klasifikasaun provizóriu ho pontu 6, Lika-Lika segundu lugár ho pontu 6 (DIT ho Lika-Lika pontu hanesan maibé diferente iha golu), terseiru lugár Sporting ho pontu 4, kuartu lugár Nagardjo ho pontu 4 (Sporting ho Nagardjo pontu hanesan maibé diferente iha golu), kintu lugár FC Lero ho pontu 3, sestu lugár Santa Cruz FC ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here