Foto hamutuk komunidade timoroan iha Inglaterra.

INGLATERRA, 8 juñu 2019 (TATOLI) – Premiadu Nobel ba Dame, Bispu Don Carlos Filipe Ximenes Belo, apoiu no kongratula timoroan lubun wain iha Inglaterra kompostu hosi ; komunidade sira iha Peterborough, Bristol, Brigwater, Oxford, Northwich, no Cambridge halibur hamutuk, dezenvolve organizasaun ho naran Salurik Timor Inglaterra, East Timor House Association (ETHA).

“Ha’u hato’o Parabéns ba imi tomak, hodi harii organizasaun ida ne’e no atan ha’u husu ba lider sira atu serbisu didi’ak, ho sakrifisiu, dedikasaun, jenerosidade no ksolok ba Salurik”, tenik Bispu Belo nu’udar Konselleiru no Membru Onoráriu SALURIK.

Nia hatutan: “Imi nia reuniaun sei hola baze ba liafuan rua importante tebes; unidade no diversidade. Diversidade tanba imi hela iha sidade oioin; mai hosi rai oioin iha Timor-Leste, nune’e mós balu iha partidu oioin, maibé ita tomak ema Timoroan”.

Ho diversidade ne’e, Amu Belo husu ba komunidade timoroan atu hametin unidade. “Unidade dehan iha neon no fuan ida de’it hodi serbisu hamutuk harii metin Salurik Timor-Inglaterra – ETHA”, afirma.

“Organizasaun ida ne’e sei fó tulun ba ema hotu, no ema hotu bele tau neon ka konfiansa ba Salurik Timor-Inglaterra. Ita labele moris mesa-mesak, maibé, ita buka atu sai solidáriu ba malu; tulun malu, vizita malu, fó apoiu ba malu, hadomi no respeita malu. Ita sei serbisu hamutuk atu Timoroan tomak bele hetan di’ak no bele hatene katak sira ema la hewai, la husik lerek”.

Mensajen ne’ebé mak hato’o ba Prezidente organizasaun, Celso Oliveira, iha loron sesta, (7/6), Bispu énfaze importánsia asosiasaun nian no husu ba lider sira atu servisu di’ak, bele tulun no sai mahon ba komunidade timoroan sira iha Inglaterra no Irlanda.

Enkontru istóriku ne’ebé partisipa liu ema 30 inklui reprezentante kada sidade, ho tema unidade iha diversidade ho sub-tema halibur no haburas komunidade Timoroan iha Inglaterra.

Salurik Timor Inglaterra-ETHA hamriik iha 2018 ho propózitu atu sai mahon ba komunidade hotu iha Inglaterra ho objetivu suporte Timoroan sira.

Salurik ninia sede iha sidade Peterborough, Reinu Unidu.

Kontribuinte: Dalia Kiakilir

Editora: Rita Almeida

1 KOMENTÁRIU

  1. Furak tebes. Wainhira imi wa’in tan iha ema nia rai halibur malu ba halo buat diak ruma hodi contribui ba valoriza no desenvolve Timor iha rai seluk, halo ami orgulho ho imi espírito patriotismo no nacionalismo hanesan Timor oan. Fortes abraços ba imi hotu.

HAKEREK NO HATÁN

Please enter your comment!
Please enter your name here