Membru PNTL bainhira hala’o aprezentasaun iha Kuartél jerál PNTL, Caicoli, Dili, foin lalais, hodi halo preparasaun asegura estabilidade nasionál. Imajen Tatoli /António Gonçalves

DILI, 04 juñu 2019 (TATOLI)—Governu Timor-Leste iha tempu besik sei deskuti regulamentu disiplinár foun atu regula membru polísia sira hotu bainhira halo atividade privadu hanesan vizita bar no festa labele lori kilat.

Iha regulamentu foun Polísia Nasionál Timor Leste (PNTL) nian ne’e sei fó kompeténsia serbisu ba Departamentu Justisa Polísia atu halo kontrolu ba membru hotu-hotu atu bele disiplina utiliza árma Estadu nian.

Tuir proposta ne’ebé Komandu PNTL hato’o ba governu, ba oin iha regulamentu disiplinár ne’e Departamentu Justisa bainhira halo investigasaun tenki atribui tan kompeténsia ida katak presiza halo patrollamentu iha kalan no loron atu kontrola membru sira ne’ebé halo serbisu.

“Ida ne’e maka propoin iha proposta alterasaun atu fó kbiit ba Departamentu Justisa halo serbisu ida ne’e. Aleinde ida ne’e, iha semana nia rohan, Departamentu Justisa nia ema halo mós patrollamentu ba iha bar no festa sira hodi haree karik iha membru polísia ruma iha ne’ebá uza farda ka sein farda sira sei kontrola,” dehan Komandante Jerál PNTL, Komisáriu Faustinho da Costa ba Agência Tatoli iha Kuartél Jerál PNTL, Dili, tersa (04/6/2019).

Departamentu Justisa hala’o kna’ar no ezekuta misaun sira ne’ebé iha relasaun ho justisa no kestaun disiplinár sira.

Departamentu Justisa nia organizasaun, kompeténsia no funsionamentu tenke tuir nórma sira Konstituisaun nian, lei no diretiva sira ne’ebé vigora iha Repúblika Demokrátika Timor-Leste nia territóriu laran, hanesan Artigu 2, 16 to’o 28, no Artigu 31 no Artigu 147 husi Konstituisaun RDTL, dekretu-Lei 9/2009 (Lei Orgánika PNTL nian) no dekretu-lei Nú. 13/2004.

Nune’e mós, Departamentu Justisa fó apoiu ka fó asisténsia legál hodi prepara prosesu legál sira ne’ebé involve PNTL nia unidade, serbisu ka Komandu sira lahó prejuizu ba podér disiplinár ne’ebé komandante sira hosi eskalaun hotu-hotu iha. Dezenvolve, propoin no koordena medida sira ne’ebé nesesáriu hodi impoin komprimentu ba justisa, disiplina no garante padraun ba prosedimentu, metodolojia no téknika ne’ebé aplikável ba investigasaun disiplinár sira.

Hala’o mós investigasaun  ba kazu sira ne’ebé iha natureza disiplinár hasoru membru PNTL sira ne’ebé serbisu iha Kuartél Jenerál PNTL nian ka iha unidade ka serbisu sira ne’ebé laiha Seksaun Justisa. Hala’o investigasaun ba kazu sira ne’ebé mak iha natureza disiplinár ne’ebé, tanba sira-nia gravidade, sensibilidade ka urjénsia, iha potensialidade atu halo fo’er PNTL nia imajen institusionál ka satan instituisaun ne’e atu hala’o nia misaun.

Kontrola membru PNTL hotu-hotu nia partisipasaun no pontualidade durante marxa sira ne’ebé obrigatóriu, asegura katak membru hotu-hotu ne’ebé prezente tenke asina loloos diáriu kona-ba partisipasaun iha marxa sira-ne’e. Fó apoiu ba Gabinete Inspetór Jerál nian iha kna’ar ne’ebé nia hala’o kona-ba administrasaun justisa no disiplina nian. Fó apoiu ba Komandante Jerál iha área hotu-hotu ne’ebé iha relasaun ho administrasaun justisa nian no disiplina.

Jornalista : Eugénio Pereira

Editór: Xisto Freitas

1 KOMENTÁRIU

  1. Hau sujere ba Komando PNTL Sa sai daiak Liu tanDepartemento Justica ho nia sub Unidade PROFOST tengki Fatin ketak hanesan mos …PM ka Policia Militar ,nee para Evita ransu malu entre membru PNTL ho membru DJ ( Departemento Justica PROFOST ) atu nune Sira bele halo Sira Nia Serbisu ho diak

HAKEREK NO HATÁN

Please enter your comment!
Please enter your name here