Prezidente CFP, Faustinho Cardoso

DILI, 05 juñu 2019 (TATOLI)—Prezidente Komisaun Funsaun Públika, Faustinho Cardoso informa iha tempu badak Komisaun Funsaun Públika sei aprezenta proposta dekretu lei kona-ba Planeamentu Forsa Traballu hodi regula funsionáriu kazuál sira iha instituisaun Estadu.

“Aleinde hato’o ba Ministériu Edukasaun, Juventude no Desportu (MEJD), ohin komisaun hato’o mós solusaun ba kestaun funsionáriu kazuál sira ba Primeiru-Ministru, Taur Matan Ruak. Signifika, iha tempu badak, Komisaun Funsaun Públika (CFP-sigla portugés) sei aprezenta Proposta Dekretu Lei kona-ba Planeamentu Forsa Traballu,” Faustinho ba jornalista sira iha Palásiu Governu, kuarta (05/6/2019).

Nia akresenta, dekretu lei ne’e sei inklui artigu ida hodi fó solusaun ba funsionáriu kazuál sira no solusaun balun ba ajente administrasaun públika sira.

“Ko’alia kona-ba funsionáriu kazuál, la’ós de’it iha Ministériu Edukasaun, maibé iha ministériu hotu iha funsionáriu kazuál ne’ebé oras ne’e tuir dadus hosi payroll ninian iha ema na’in 6.000 resin,” nia hateten.

Nune’e mós, nia dehan, partikularmente nia ho Xefe Governu ko’alia mós kona-ba situasaun iha MEJD  nian.

“Dala ida tan, ida ne’e hanesan polítika ministériu ninian, tanba kontratasaun funsionáriu kazuál sira kabe ba ministériu ida-idak atu desidi atu kontinua estende ka la’e,” tenik Faustinho.

Maski nune’e, nia mós akompaña iha loron hirak liu-ba funsionáriu kazuál iha MEJD halo protestu tanba laiha estensaun ba kontratu.

“Ne’e polítika ministériu ninian.  Komisaun Funsaun Públika lahatene basaa la rejistadu iha baze dadus komisaun nian tanba sira selu ho verba bens no serbisu. Tanba ne’e mak ba oin ita buka haree to’ok oinsá regula funsionáriu kazuál iha ministériu sira,” nia informa.

Prezidente CFP esplika, funsionáriu kazuál rasik hanesan funsionáriu ne’ebé serbisu iha instituisaun Estadu ne’ebé ho estatutu la’ós permanente maibé kontratadu. Sira-nia serbisu atu ajuda serbisu eventuál, projetu no prestasaun serbisu ne’ebé mak nia natureza la permanente no hetan kontratu direta hosi instituisaun ida-idak, la’ós rekruta hosi CFP.

Molok ne’e, MEJD desidi la estende kontratu funsionáriu kazuál hamutuk 273, nune’e mosu protestu tanba ministériu loke vaga serbisu hamutuk 94 ba públiku tuir méritu hodi sai funsionáriu públiku ba apoiu serbisu ministériu nian.

Jornalista: Julia Chatarina

Editór: Xisto Freitas

1 KOMENTÁRIU

  1. Hau nudar ajente funsionario ida ba parte contratado mos apresia….tanba nee fas parte halo hela serbisu governo nian…tanba sdaaaa mak parte difisil ita persiza malu atu kompleta nesesidDe ba makina estado hodi lao diak no efisiensia maibe ikus maimosu duplikadu losssss….

HAKEREK NO HATÁN

Please enter your comment!
Please enter your name here