Komandante Jerál PNTL, Komisáriu Faustinho da Costa. Imajen António Gonçalves

DILI, 4 juñu 2019 (TATOLI)Komandu Polísia Nasionál Timor-Leste (PNTL) aprezenta ona proposta foun ida ba Ministériu Interiór kona-ba atu harii Unidade Departamentu Tránzitu Kontrolu Auto Estrada (UDTKAE), Unidade Fraude Fiskál (UFK) no troka naran Unidade Polísia Marítima ba Unidade Seguransa Kosteira (USC-sigla portugés).

Nia esplika, UDTKAE sei prepara hodi halo ninia misaun ba futuru kontrola auto estrada Timor-Leste nian ne’ebé hahú ona iha kosta súl, Munisípiu Covalima-Viqueque.

“Ita haree Timor-Leste iha ona auto estrada hosi Suai atu liga ba kosta súl. Ami hanoin presiza iha Unidade Tránzitu Nasionál (UTN) ne’ebé iha ninia departamentu própriu ita harii Unidade Departamentu Tránzitu Kontrolu Auto Estrada (UDTKAE) atu haree ba estrada. Pur-ezemplu, iha nasaun seluk, iha unidade hanaran HV- Patroll,” dehan Komandante PNTL, Komisáriu Faustinho da Costa ba Ajénsia Tatoli iha nia kna’ar fatin, Kuartel Jerál PNTL, Dili, tersa (4/6/2019).

Kna’ar UDTKAE, nia dehan, sei estabelese bainhira lei orgánika PNTL aprovadu bele iha ona patrollamentu própriu atu halo kontrolu ba Timor-Leste nia auto estrada.

Proposta ida tan mak Komandu PNTL hakarak harii UFP atu haree ba kazu pasivu no ativu ne’ebé liga ba krime brankeamentu kapitál.

“Ami mós propoin atu hamosu tan Unidade Fraude Fiskál (UFK) nu’udar unidade ida atu haree problema sira hanesan kazu pekulatu, iha korrupsaun pasivu ativu iha ne’ebé durante ne’e Polísia Serbisu Investigasaun Kriminál (PSIK) mak halo. Se ita hamosu UFK, signifika ita bele haree kazu sira ne’e pasivu liu inklui haree ba kazu brankeamentu kapitál ne’ebé ami hato’o ba ministru bele haree no orienta saida maka asesór tékniku presiza ita sei deskuti liu-tan,” dehan Komandante Faustinho.

Aleinde ida ne’e, PNTL haree mós Unidade Polísia Marítima (UPM) tuir Lei Orgánika PNTL, Dekretu-Lei 9/2009, Artigu 32 (1). Ema hotu akompaña UPM durante ne’e dalaruma tanba kestaun ida marítima ne’e ikus mai ema bolu dehan mariñeiru ka dalaruma ema interpreta dehan navál. Nune’e, Komandu PNTL hato’o ona proposta ba Ministru Interiór atu deskuti ninia lala’ok.

“Atu labele iha miss interpretasaun, ami troka fila fali naran ba Unidade Seguransa Kosteira (USC). Ne’e para ita apár ho liafuan atu labele interpreta liafuan mariña no mariñeiru ka navál,” nia esplika.

Faustinho subliña, UPM hala’o nia kna’ar atu prevene no kombate krime tráfiku droga, tráfiku umanu, terrorizmu,  pirata, imigrasaun klandestina no poluisaun marítima, fó seguransa ba área tasi-ibun no domíniu públiku marítima, monitoriza, proteje ambiente marítima, riku-soin tasi okos. Alende ne’e mós fó vijilánsia iha fronteira marítima no iha koordenasaun ho forsa Navál F-FDTL.

Nia salienta katak Unidade Marítima nu’udar parte ida hosi Sistema Autoridade Marítima no estabelese ona espesifikamente atu fó vijilánsia no monitoriza área tasi-ibun no tasi sira Estadu nian  tuir Lei Orgánika PNTL, Dekretu-Lei 9/2009, Artigu 32 (1). Misaun ida ne’ebé inklui iha kuadru autoridade marítima mak, atu salva guarda ema-nia moris iha tasi no atu fornese serbisu salva marítimu nian tuir artigu 32 (2. f).

Totál membru UPM efetivu hamutuk na’in 120, hodi fahe ba área tolu mak hanesan serbisu iha postu (Postu Batugade, Atabae, Ataúro, Beloi, Portaun Portu Dili, Sional Dili no Postu Com-Lospalos), serbisu iha ró (ró NRTL Lusitânia, NRTL Dili, NRTL Hera, NV Timor-Leste, speed boat 12) no serbisu iha kuartél UPM.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here