Eis Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), Marí Alkatiri. Imajen Tatoli/ Egas Cristóvão

DILI, 07 juñu 2019 (TATOLI)—Líder istóriku, Marí Alkatiri konsidera operasaun konjuta hosi Patrimóniu Estadu, Polísia Nasionál Timor-Leste (PNTL), Diresaun Nasionál Transporte Terrestre (DNTT) no Komisaun Antí-Korrupsaun (CAC-sigla portugés) iha kada semana ba karreta Estadu nu’dar meiu di’ak ida atu proteje sasán Estadu, maibé presiza mós haree operasaun ba jogu ilegál sira.

“Agora halo ‘kasa’ ba kareta governu nian iha semana nia rohan, ne’e loos ona maibé tenke ‘kasa’ uluk mak jogu ilegál sira ne’e,” nia tenik hodi hatán ba jornalista sira nia pergunta iha Palásiu Governu, sesta ne’e, relasiona ho asuntu operasaun ba karreta Estadu mensionadu iha leten.

Tuir nia, impaktu hosi jogu ilegál rezulta osan barak mak sai no uituan de’it mak sírkula iha rai laran.

“Osan iha ne’e hanesan tránzitu de’it. Osan hela iha Timor uituan no barak liu mak sai ba li’ur. Balun sai tanba projetu no balun sai tanba jogu ilegál,” eis primeiru-ministru esplika.

Tanba ne’e, nia fó hanoin, presiza iha polítika hosi governu atu regula jogu ilegál iha Timor-Leste (TL).

“Ema hotu hatene jogu ilegál bar-barak maibé ha’u la-haree iha polítika ida hosi parte ezekutivu atu haruka taka. Ita-nia polísia sira tenke haree,” nia katak tan.

Marí haktuir, jogu ilegál iha Banana Road (Hudi-Laran) ne’e agora atu sai fali China Road (Xina-Laran), tanba jogu ilegál mak nakonu.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here