Pasaporte komún Timor-Leste. Imajen/google

DILI, 07 juñu 2019 (TATOLI)-Durante fulan lima nia laran, hosi janeiru to’o maiu, tinan ne’e, Diresaun Nasionál Rejistu no Notariadu, Ministériu Justisa  (DRNR-sigla Portugés) rekolla ona reseita   ba kofre estadu  ho valór $685.200.00.

Reseita ne’e kobra liuhosi atividade servisu  emisaun  pasaporte  ba sidadaun 11.286 ne’ebé implementa iha Munisípiu Dili, Bobonaro ho mós Rejiaun Administrativa Espesiál Oe-Cusse Ambeno (RAEOA).

Diretór Diresaun Nasionál Rejistu no Notariadu (DNRN), João Fernando Martins Borges relata, tuir estatístika hosi janeiru to’o maiu,  sidadaun 4.202 maka hasai ona pasaporte komún iha Dili, pasaporte servisu 386, pasaporte diplomátiku 149 no pasaporte estranjeiru na’in ida.

Iha Munisipiu Bobonaro emisaun ba pasaporte komún hamutuk ema 684 enkuantu ba pasaporte servisu, diplomátiku no estranjeiru laiha.

Iha RAEOA rejista sidadaun hasai pasaporte komún hamutuk 510, maibé pedidu ba pasaporte tolu seluk la rejista.

“Pedidu pasaporte komún barak liu, depois servisu  no diplomátiku, maibé pasaporte estranjeiru ne’e dala ruma tinan ida pedidu husu rua de’it tanba pasaporte estranjeiru fó ba ema estranjeiru ne’ebé laiha reprezentasaun embaixada iha Timor-Leste,” hatete Diretór Nasionál DNRN,  João Fernando Martins Borges, ba Ajénsia TATOLI, Kuarta  (05/6/2019), iha Bebora, Dili.

Iha tinan kotuk 2018, DNRN rekolla  ona reseita millaun ida rihun atus neen resin ba kofre estadu liuhosi atividade emisaun pasaporte.

Jornalista      : Agapito dos Santos

Editór            : Francisco Simões

 

HAKEREK NO HATÁN

Please enter your comment!
Please enter your name here