Família pasiente, José Lourenço Pereira Borges, bainhira halo entrevista ho TATOLI iha klínika ONGV, ohin. Imajen Jogerjo Guterres

DILI, 7 juñu 2019 (TATOLI) – Família pasiente, José Lourenço Pereira Borges, sente hakfodak kahur ho hirus bainhira lori oan mane ba halo tratamentu iha klínika Ospitál  Nasionál Guido Valadares (ONGV), tanba haree profisionál saúde ne’ebé fó atendimentu hasai lia-maka’as.

Ho situasaun ne’e, José Lourenço Pereira Borges husu Governu atu fó formasaun iha área edukasaun sívika ba pesoál saúde sira, nune’e fó atendimentu di’ak ba komunidade.

“Ospitál ne’e hanesan fatin atu fó sokorru ba ema, tan ne’e hanesan funsionáriu ospitál nian tenke atende ema ho didi’ak, tanba atitude ida ne’ebé ko’alia ba ema, ha’u hanesan sidadaun la-simu”, espresa nia ba TATOLI iha klínika ONGV, ohin.

Nia hatutan: “Tenke ko’alia ho didi’ak, ha’u haree sira ko’alia kasar loos, hatudu oin buis, loloos ne’e atende ema ho oin hamnasa, keta halo ba ita atende ema ho hamnasa maske ema ne’e mai ho kondisaun moras maka’as mós nia bele sente di’ak uitoan”.

José akresenta kuandu pesoál saúde mak ko’alia ho hakilar de’it maka ema ne’e moras no aumenta tan moras, tanba de’it ta’uk ho atendimentu.

“Ha’u nia oan nia kabun moras maka’as ne’ebé nia la ba serbisu no ha’u dehan ita tenke ba ospitál lalais para hetan sokorru, mai to’o iha ne’e hasoru kedas atendimentu ladi’ak husi funsionáriu ospitál nian”.

Situasaun hanesan dala-ruma akontese iha sala urjénsia.

Xefe Departamentu Banku Urjénsia ONGV, Nilton da Silva. Imajen Jogerjo Guterres

Xefe Departamentu Banku Urjénsia ONGV, Nilton da Silva, rekoñese situasaun balun, tanba pesoál sira okupadu no parte seluk mós fó prioridade ba pasiente sira ne’ebé nia moras ameasa ba ninia vida.

“Loos duni situasaun ne’e maka sempre akontese, maibé ha’u bele dehan pesoál saúde sira hasai liafuan ne’e la ho fuan ka hirus, maibé tanba situasaun balu halo sira hodi hasai lia-fuan, hanesan pasiente balu mai ho kondisaun normál, maske mai uluk, no pesoál saúde sira fó atendimentu uluk ba sira ne’ebé mai ikus, situasaun diferente, tanba ida ikus ho kondisaun grave, ida ne’e maka dala barak halo família pasiente sira la satisfeitu”, esklarese Nilton da Silva.

Nia afirma situasaun ne’e dala barak akontese tanba mós pasiente barak, no limitadu médiku, entaun labele fó atendimentu, maske nune’e médiku sira sempre buka maneira oioin, no nu’udar ema kriatura ne’ebé sei la sees hosi sala.

“Ha’u haree kolega médiku, parteira, enfermeiru sira servisu ho profisionál, ho fuan, ne’ebé lia-fuan ne’ebé sira hasai la ho laran”, katak Nilton.

Xefe Departamentu Banku Urjénsia ONGV esplika loloos pasiente ne’ebé sente moras normal la presiza ba ONGV, tenke ba uluk sentru saúde sira.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here