Diretor CEFTEC , Luis Evaristo, akompanha husi ekipa SEKOMS kualia ba jornalista sira konaba Seminar Internasional Estabelesimentu Institutu Formasaun Jornalista iha dia 11 Juinu 2019. Imajen/Antonio Goncalves

DILI, 07 juñu 2019 (TATOLI) – Sekretaria Estadu Komunikasaun Sosiál (SEKOMS) liu-hosi Sentru Formasaun Téknika iha Komunikasaun (CEFTEC-sigla portugés) sei realiza Semináriu Internasionál durante loron ida kona-ba Estabelesimentu Institutu Formasaun ba Jornalista, hodi ko’alia kona-ba enkuadramentu legál, kurríkulu no dezafíu sira.

Semináriu internasionál ne’e sei realiza iha tersa (11/06/2019) iha salaun Suai Room, Otél Timor Plaza, Dili. Semináriu internasionál ne’e hahú husi tuku 08h00 to’o 17h00.

Diretór Nasionál CEFTEC, Luis Evaristo dos Santos Soares hateten CEFTEC nu’udar embriaun ba estabelesimentu Institutu formasaun ba jornalista liu-hosi SEKOMS, tanba ne’e  sei sai responsável ba semináriu ne’e.

Nia informa, semináriu ne’e sei konvida oradór internasionál husi Indonézia no Portugal no mós nasionál sira ne’ebé kompetente iha área jornalizmu no iha esperiénsia iha estabelesimentu institutu ba informasaun no komunikasaun.

“Ita presiza akompañamentu iha diskusaun kontinua. Tanba ne’e semináriu hanesan dalan ida atu rona sira-nia opiniaun, matenek nu’udar referénsia ba ita atu harii ita ninia instituisaun ne’e,” nia tenik durante halo konferénsia imprensa kona-ba semináriu internasionál iha salaun CEFTEC, Palásiu Governu, sesta ne’e.

Tuir nia, SEKOMS nafatin kontinua kooperasaun ho parseiru sira nu’udar polítika Governu to’o estabelesimentu instituisaun formasaun jornalista.

Diretor CEFTEC , Luis Evaristo, akompanha husi ekipa SEKOMS kualia ba jornalista sira konaba Seminar Internasional Estabelesimentu Institutu Formasaun Jornalista iha dia 11 Juinu 2019. Imajen/Antonio Goncalves

Diretór ne’e akresenta, semináriu ne’e sei fahe ba sesaun haat, ne’ebé akumula ona nesesidade. “Sesaun dahuluk liga ho polítika Governu nian ba estabelesimentu intitutu formasaun jornalizmu tuir lei hateten, ne’ebé sei foti referénsia husi oradór sira”.

Enkuantu iha sesaun tuir mai oradór sira sei ko’alia kona-ba perspetiva legál no akadémiku, relasaun entre mídia sira ho instituisaun estadu no privadu, referénsia judisiáriu, sentru treinamentu no tema seluk tan liga ho estabelesimentu institutu sentru treinamentu jornalizmu.

Objetivu husi semináriu ne’e rasik atu halibur informasaun nu’udar referénsia husi atividade relevante sira, kompostu husi aspetu perspetiva globál ne’ebé relasiona ho interese estadu ka nasionál, no perspetiva operasionál liu-hosi komparasaun nasaun seluk nian kona-ba modelu legál no kurríkulu no dezafíu saida mak tenke ultrapassa iha prosesu estabelesimentu no operasionál institutu ne’e.

Nune’e, dokumentu finál husi rezultadu semináriu internasionál ne’e sei sai nu’udar baze dadus ne’ebé mak importante ba CEFTEC, nu’udar embriaun atu bele halo análize ida no kontestualiza ho Timor-Leste ninia kondisaun kona-ba atu harii institutu formasaun jornalista ne’ebé efisiente no efikás hodi bele garante kualidade no sustentabilidade jornalizmu no dezenvolve institutu ne’e iha nível nasionál no internasionál.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here