Diretor Diresaun Nasional Rejistu no Notariadu, João Fernando Martins Borges. Imajen/Antonio Goncalves

DILI, 07 juñu 2019 (TATOLI)-Diretór Diresaun Nasional Rejistu no Notariadu (DNRN), Ministériu Justisa,  João Fernando Martins Borges, hatete, prosesu sosa blanku Billete Identidade (BI) iha ona prosesu aprovizionamentu hodi loke konkursu públiku atu kompañia fornesedór sira  kompete.

“Prosedimentu lao hela no prosesu tenderizasaun ba akizisaun mós lao hela,” informa  Diretór DNRN ne’e ba Ajénsia TATOLI, iha Bebora, Dili, Kuarta (5/6/2019).

DNRN sei sosa blanku BI hamutuk rihun 55 ba munisípiu 6, inklui Rejiaun Administrativu Espesiál Oe-Cusse Ambeno (RAEOA) durante 2019 no sei sosa tan iha tinan oin 2020.

“Ita la husu atu sosa barak tanba projetu ida ID Úniku ne’e mai iha posibilidade ita sei troka tan kartaun, entaun ita tenke husu ho kalkula ida razoavel para iha mudansa ruma iha polítika la afeta ba blanku barak la uza,” hatete João Fernando Martins Borges.

Durante ne’e, DNRN uza Blanku BI ne’ebé prodús hosi 2010, maibé estoke ne’e hotu  iha inísiu 2019.

“Durante ne’e ami aguenta hela ho apoiu Uniaun Europeia liuhosi programa pas PALOPS  ba alargamentu BI ba munisípiu sira maibé to’o inísiu 2019 blanku sira hotu hodi hein akizisaun foun,”.

Iha 2017, DNRN husu ona ba governu atu sosa maibé la konsege tanba governu aguenta de’it ho orsamentu duodesimu. Nune’e, to’o agora DNRN kontinua atende sidadaun sira ho kartaun BI provizóriu.

Jornalista      : Agapito dos Santos

Editór            : Francisco Simões

HAKEREK NO HATÁN

Please enter your comment!
Please enter your name here