Eis Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), Marí Alkatiri. Imajen Tatoli/ Egas Cristóvão

DILI, 07 juñu 2019 (TATOLI) – Agora daudauk Autoridade Rejiaun Administrativa Espesiál Oe-cusse Ambeno (RAEOA) la-integra iha sistema Government Recourses Planning (GRP) ka Planeamentu Rekursu Governu, mezmu reseita no despeza ba rejiaun ne’e rasik engloba ona iha Orsamentu Jerál Estadu (OJE).

Prezidente Autoridade Rejiaun Administrativa Espesiál Oe-cusse Ambeno (RAEOA) no Zona Espesiál Ekonomia Sosiál Merkadu (ZEESM), Marí Alkatiri informa katak kona-ba kestaun ne’e, nia rasik manda ona karta ba Primeiru-Ministru (PM), Taur Matan Ruak hodi dadus ezekusaun RAEOA bele tama iha portál transparénsia hodi públiku bele akompaña.

“Ha’u haruka ba tutela Primeiru-Ministru no ohin Primeiru-Ministru konfirma dehan simu ona. Entaun Primeiru-Ministru mak haruka ba ninia ministériu, ha’u la manda iha ministériu sira. Primeiru-Ministru mak sei haruka ba Ministériu Finansa no ba Parlamentu Nasionál,” hateten Prezidente RAEOA, Marí Alkatiri ba jornalista sira iha Palásiu Governu, sesta ne’e.

Nia rasik preokupa tanba husu kle’ur ona atu Autoridade RAEOA bele integra iha sistema GRP ne’ebé kria husi Empreza FreeBalance.

“Ha’u mós preokupa no husu kle’ur ona dezde ha’u ba RAEOA. Ha’u husu maibé Governu seidauk tau. Ha’u preokupa liu sira tanba FreeBalance. Husu ba Governu Sentrál, foin daudauk Primeiru-Ministru foin tama ha’u hakerek kedan karta ba nia no ezije sistema FreeBalance ba Oe-cusse”.

“Ha’u hein hela bainhira mak atu monta sistema ne’e,” reforsa autoridade másima RAEOA- ZEESM. Marí Alkatiri.

Tinan 2020, RAEOA Sei Integra Iha Sistema GRP

Ministra Finansa en ezersísiu, Sara Lobo Brites foin lais ne’e informa katak RAEOA iha tinan 2019 iha hela faze tranzisaun no tinan 2020 bele integra ona iha sistema GRP. 

Tuir Ministra, agora daudauk tékniku Ministériu Finansa serbisu hamutuk RAEOA para bele hetan informasaun no publika daudaun ezekusaun orsamentu RAEOA iha portál transparénsia Governu sentrál, nune’e públiku bele akompaña.

Ministra akresenta, iha orsamentu 2019, Orsamentu ba RAEOA iha sistema tau iha verba transferénsia públika, nune’e kuandu transferénsia públika ona no bainhira Governu sentrál transfere sai ona entaun hanesan kompeténsia instituisaun ne’ebé mak simu atu jere rasik nia osan.

Nune’e nia dehan tan, Lei Orsamentu prevee artigu ne’ebé mak fó tranzisaun durante preparasaun RAEOA sei uza lai ninia sistema rasik to’o tinan 2020 mak tau osan labele ona iha transferénsia públika maibé tenke tau tuir kategória, hanesan mós ministériu, munisípiu, no Ajénsia Autónomu sira para bele uza sistema ida de’it.

Nia mós admite, bainhira sistema atu monta tenke halo preparasaun lubuk ida no Ministériu Finansa ninia ekipa ne’ebé koordena prosesu ne’e la’o hela, maibé iha sasán balun mak tenke prepara uluk molok tama iha implementasaun sistema.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here