Mapa Postu Administrativu Atsabe. Imajen Google

ATSABE, 7 juñu 2019 (TATOLI)—Autoridade iha Postu Administrativu Atsabe, Munisípiu Ermera, husu governu liuhosi Sekretaria Estadu Komunikasaun Sosiál (SEKOMS), atu harii rádiu komunidade ida iha Atsabe tanba durante ne’e atu asesu informasaun defísil tebes.

“Ami susar asesu ba informasaun. Tanba ne’e, ami hakarak iha Atsabe iha rádiu komunidade ida, nune’e bele kobertura ba atividade ne’ebé la’o iha Atsabe. Nune’e mós rádiu komunidade ne’e bele transmiti fali informasaun sira hosi nasionál ba ami,” Xefe Suku Atara, Ancelmo Pereira, informa kestaun ne’e bainhira partisipa iha sensibilizasaun programa pilotu ‘Naroman ba Suku’, iha postu Atsabe, sesta (7/6/2019.

Iha fatin hanesan, Xefe Suku Leimea-Leten, José de Araújo, hateten Atsabe mukit informasaun hosi mídia Estadu nian. “Rádiu Kafé Ermera aat liu. Ami la asesu, tanba ami iha área ne’ebé kle’an liu. Ami iha ne’e foho barak hale’u ami. Di’ak liu governu harii rádiu komunidade ida hodi hamaluk ami,” informa Xefe Suku Leimea-Leten.

Nia rekoñese katak durante ne’e asesu de’it Rádiu Maubere, RTTL ho GMNTV, maibé ba sira ne’ebé iha parabola mak asesu.

“Nusa mak akontesimentu iha fatin seluk, ohin akontese, kalan sai kedas. Nusa mak Atsabe lae? Karik tanba ami Atsabe oan laiha jornalista mak hanesan ka oinsa? Tanba ne’e, ami husu tau hela ajenda ba,” nia kestiona.

Hatán ba preokupasaun ne’e, Sekretáriu Estadu Komunikasaun Sosiál, Merício Akara, dehan posibilidade Atsabe bele iha rádiu komunidade ketak ida.

“Tinan oin ami planu harii tan rádiu komunidade tolu ka haat. Espera ida bele harii iha Atsabe. Tékniku governu nian sei haree ba asuntu ne’e,” nia informa.

Governante ne’e mós promete ba komunidade katak tinan oin sei harii tan torre hamutuk 13 iha territóriu nasionál, nune’e komunidade bele asesu RTTL ho persentajen másima (%100). “RTTL oras ne’e foin fó asesu informasaun %48 de’it. Signifika, komunidade barak seidauk asesu RTTL,” tenik Akara.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here