Bolseiru timoroan na’in hitu (7) hasai foto hamutuk ho reprezentante Kompañia ConocoPhillips no ANPM iha salaun Timor Plaza, Dili, sesta (07/06). Imajen Tatoli/Eugénio Pereira

DILI, 07 juñu 2019 (TATOLI)Kompañia ConocoPhillips liuhusi Graduated Intersnship Program fó bolsu estudu ba timoroan na’in hotu (7) ne’ebé ramata ona sira-nia estudu petróliu iha Chares Darwin University, Austrália.

Timoroan na’in hitu ne’e mak hanesan Amelia da Gloria Fátima, Agostinho da Silva, Angelo Janeiro Soares, Almedio Marves da Costa, Dilma dos Reis Araújo Fernandes, Eufragio Fernandes Xavier no Júlio Casimiro Silva ba eskola iha Chares Darwin University hahú iha novembru 2018-abril 2019.

Jerente Kontiúdu Lokál Autoridade Nasionál Petróliu no Minerál (ANPM), Estanislau Martins, hato’o agradese ba kompañia ConocoPhillips nia esforsu hodi kontinua kapasita rekursu timoroan nu’udar preparasaun ida atu serbisu iha projetu indústria mina no gás.

Nia dehan ho rekursu kualifikadu ne’ebé ConocoPhillips prepara ona, ANPM husu ba Kompañia internasionál no nasionál ne’ebé presiza rukursu bele foti timoroan hirak ne’e ba serbisu hodi dezenvolve sira-nia atividade kompañia nian.

“Lori Prezidente ANPM nia naran, ha’u hato’o agradese ba ConocoPhillips hodi kapasita ita-nia timoroan sira atu prepara aan ba indústria mina no gás,” dehan Estanislau durante serimónia abertura simu bolseiru hirak ne’e iha salaun enkontru Timor Plaza, Dili, ohin.

Estanislau informa, ANPM kontinua koopera ho ConocoPhillips no kompañia internasionál no lokál hodi serbisu hamutuk iha área oioin kontribui ba dezenvolvimentu Timor-Leste.

Lori ANPM nia naran, nia husu ba timoroan na’in hitu ne’ebé ramata ona sira-nia estudu bele kontinua implementa matenek ne’ebé sira iha atu serbisu iha fatin foun ho di’ak liu-tan.

“Mensajen ba kolega na’in hitu (7), imi hatudu ona imi nia étika serbisu no disiplina no imi iha kapasidade. Ha’u atu dehan katak uluk bainhira diskusaun barak oinsá maka prepara ema ba Bayu Undan, sira (kompañia internasiónal) dehan timoroan laiha skill ne’ebé natón atu bele serbisu iha indústria mina no gás, tanba preparasaun laiha. Maibé, ohin, ha’u dehan pasu di’ak ne’ebé timoroan sira hetan bele preparadu no prontu serbisu iha kualkér investimentu mina no gás,” nia haklaken.

Estanislau salienta, ba oin, ANPM mós kontinau koopera ho Ministériu Petróliu no Minerál (MPM), Kompañia TIMOR GAP hodi kapasita nafatin timoroan sira ne’ebé iha futuru sei serbisu iha Plataforma Projetu Suai Supplay Base, Refinaria Betano no sentru prosesamentu Gás Natural Liquefeito (GNL) Beaço-Viqueque.

Tuir nia, ohin loron rekursu ne’ebé Timor-Leste iha sei menus, maibé Estadu Timor-Leste iha kompromisu boot kapasita rekursu nu’udar objetivu prinisipál iha programa governu nian.

Entretante, estudante hirak ne’e mós aprezenta sira nia perfil no esperiénsia serbisu ne’ebé sira hetan ho esperansa ida katak kompañia nasianál no internasionál presiza rekursu bele utiliza sira nia kapasidade.

 

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here