Prezidente Autoridade RAEOA, Marí Alkatiri. Imajen Tatoli/António Gonçalves

DILI, 7 juñu 2019 (TATOLI) – Prezidente Autoridade Rejiaun Administrativu Espesiál Oe-Cusse Ambeno (RAEOA), Mari Alkatiri, husu ba governu Timor-Leste (TL) ho Repúblika Indonézia (RI), atu haree timoroan oan na’in rua ne’ebé iha Autoridade Migrasaun Indonézia nia liman.

“Ha’u labele tau kanuru tohar ba ne’ebá, maibé Estadu ida ho Estadu seluk, nia responsabilidade maka governu sentrál Timor-Leste ho Repúblika Indonézia nian atu ko’alia ba malu kona-ba timoroan na’in rua ne’ebé iha hela Indonézia nia liman,”  hatete Prezidente RAEOA, Mari Alkatiri, ohin,  iha Palásiu Governu, hafoin hasoru malu ho Primeiru-Ministru, Taur Matan Ruak.

Atu evita kazu droga, Mari Alkatiri, husu ba governu liuliu parte Servisu Migrasaun atu kontrola didi’ak área fronteira.

“Tenke kontrola fronteira tanba ida ne’e pertense ba governu sentrál, kazu ida ne’e la’ós pertense ba governu rejionál ka la’ós iha Oe-Cusse, se ida ne’e akontese iha Oe-Cusse, ha’u sei hatán, maibé kazu ne’e akontese iha Mota-Ain” hateten nia.

Lideransa nasionál ne’e husu ba timoroan hotu atu kuidadu bainhira servisu ba ema seluk, se la kuidadu maka ema bele kaer no lori ba kadeia.

“Ita tenke kuidadu, ita tenke kombate iha rai laran, la’ós iha fronteira, se konsege sai hosi ne’e ba Timor Osidentál (NTT-sigla indonézia), tanba ema balun hatama iha ne’e, entaun ai-moruk droga ne’e mai hosi ne’ebé,” tenik Alkatiri.

 Jornalista      : Zezito Silva

Editór             : Francisco Simões

HAKEREK NO HATÁN

Please enter your comment!
Please enter your name here