Deputadu, Adérito Hugo da Costa.

DILI, 6 juñu 2019 (TATOLI)-Komisaun B Parlamentu Nasionál (PN) ne’ebé trata asuntu Defeza no Seguransa, Kuarta (5/6/20190), halo audiénsia ho Komandante Jerál Polisia Nasionál Timor-Leste (PNTL), Komisáriu Faustino da Costa, hodi hetan informasaun atuál kona-ba situasaun seguransa iha territóriu nasionál, inklui kazu omisídiu ne’ebé akontese iha fulan maiu nia laran.

Iha sorumutuk ne’e, komisaun B ne’ebé lidera hosi prezidente komisaun Aderito Hugo da Costa, aprezenta komisaun nia preokupasaun, liuliu relasiona ho kazu omisídiu ne’ebé rezulta ema mate, hanesan iha Tirilolo-Baucau, Vemasse, no mós iha Dili (Jardim Otél Timor nia oin).

“Akontesimentu sira ne’e  hetan atuasaun no intervensaun direita hosi PNTL hodi kontinua garante seguransa hakmatek iha territóriu nasionál,”  hateten Deputadu Aderito Hugo hodi haktuir afirmasaun Komisáriu Faustino da Costa nian iha sorumutuk ho Komisaun B.

Komisaun B mós husu ba Komandu PNTL atu akompaña andamentu prosesu kazál Timoroan ne’ebé autoridade Indonézia prende tanba deskonfia lori ai-moruk droga tama ba Atambua-Kupaun, Timor Osidentál (NTT-sigla indonézia).

Komisaun B, tuir Aderito Hugo, lamenta ba akontesimentu ne’e, maibé afirma katak presiza reforsa tan rede kontrolu nian ka jestaun kontrolu tenke halo di’ak, maske iha frakeza ruma ne’ebé iha presiza rejista no hadi’a di’ak liután.

“Ita tenke reforsa nafatin servisu iha fronteira, jestaun fronteira tenke hadi’a liuhosi frakeza sira, dezenvolve kapasidade rekursu umanu iha porta entrada no saida inklui ekipamentu sira tenke funsiona,” hatete Aderito Hugo.

Komandante Jerál PNTL, Komisáriu Faustino da Costa. Imajen/António Gonçalves

Biban ne’e, Komisáriu Faustino da Costa, friza katak kazál Timoroan ne’ebé lori droga ne’e iha ona autoridade Indonézia nia liman. Maibé autór prinsipál ne’ebé deskonfia sai na’in ba ai-moruk droga hirak ne’e PNTL prende ona hodi submete ba prosesu investigasaun no balun iha ona prizaun preventiva.

“Prosesu ba sidadaun timoroan na’in rua la’o hela iha Indonézia maibé iha rai laran ita prosesa ona sidadaun estranjeiru balun ne’ebé hetan ona prizaun preventiva,” informa Komisáriu Faustino da Costa.

Nia esklarese katak PNTL laiha dalan atu trava prosesu ne’e, maibé PNTL iha ligasaun tékniku no polítiku atu bele deside sidadaun na’in rua. Ho nune’e, Komandu PNTL haruka ona karta ba governu atu bele haree timoroan na’in rua ne’ebé prosesa iha Indonézia.

Jornalista        : Zezito Silva

Editór              : Francisco Simões

HAKEREK NO HATÁN

Please enter your comment!
Please enter your name here