Mesquita An-Nur Dili. Imajen/Google

DILI, 06 juñu 2019 (TATOLI)—Governu Timor-Leste aprezenta felisitasaun no solidariedade ba komunidade musulmanu iha Timor-Leste, relasiona ho selebrasaun Idul Fitri ne’ebé marka ona iha rohan hosi periúdu jejun Ramadaun nian.

“Idul Fitri fó mai ita oportunidade hodi reforsa lasu amizade no respeitu ba ema seluk, kultura, no rejiaun, nune’e hanesan oportunidade atu halo reflesaun kona-ba importánsia perdaun no rekonsiliasaun liuhosi forma kontribui ba mundu ne’ebé pasífiku liu”, refere komunikadu divulgadu hosi Portál Ofisiál Governu ne’ebé Agência Tatoli asesu iha kinta ne’e.

Tuir komunikadu katak loron ne’e (Idul Fitri) hanesan momentu festivu ba família musulmana sira hodi fó perdaun ba malu, la’ós de’it ba sira-nia rejiaun maibé komunidade izlámika sira ne’ebé espalla iha mundu, nune’e mós iha Timor-Leste.

“Iha Timor-Leste, hanesan oportunidade di’ak para ema hotu bele selebra importánsia hosi dame, toleránsia no solidariedade”, akresenta komunikadu ne’e.

Ba loron Idul Fitri, Governu Timor-Leste deklara ona liuhosi Despaisu nú.2/2019/I/PCM, katak iha loron 6 juñu 2019 hanesan feriadu nasionál, ho hanoin ida katak bele fó biban ba povu sira hodi partisipa iha orasaun no festividade sira, hamutuk ho maluk musulmanu sira.

Desizaun ne’e rasik, bazeia ba Lei nú.10/2005, 10 agostu ne’ebé determina loron bazeia rejime jurídiku ba feriadu, data ofisiál komemorativa, toleránsia pontu no informasaun hosi Sentru Komunidade Izlámika Timor-Leste, ne’ebé hatudu iha loron 5 no 6 juñu, hanesan loron komemorativu ba Idul Fitri.

 

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here