Sekretáriu Estadu ba Asuntu Kombatente Libertasaun Nasionál, Gil da Costa Monteiro 'Oan Soru'. Imajen António Gonçalves

DILI, 04 juñu 2019 (TATOLI)—Sekretáriu Estadu ba Asuntu Kombatente Libertasaun Nasionál, Gil da Costa ‘Oan Soru’, hateten veteranu falsu ne’ebé simu osan sei simu ‘konsekuénsia’ iha futuru.

“Ami identifika ona veteranu falsu ne’e rihun-ida resin. Balun falsifika dokumentu ba hatán ona iha tribunál no balun seidauk. Sira (veteranu falsu) ne’ebé simu ona osan, sei fó-fila osan ba Estadu no ba kadeia, maibé ita sei halo verifikasaun lai,” dehan Oan Soru ba Agência TATOLI iha nia kna’ar-fatin, Caicoli, tersa (04/5/2019).

Governante ne’e mós dehan, la’ós komisaun omenájen mak fasilita, maibé individu sira ne’ebé trata dokumentu ne’e mak sai autór.

“Ita akompaña, balun habosok hela povu hodi rekolla osan ho dalan ilegál. Povu lalika fiar ba ida ne’e. Fulan setembru mak sei verifika loloos,” nia realsa.

Sekretáriu Estadu ne’e informa katak verifikasaun ba dadus veteranu ne’ebé sei realiza iha fulan-setembru, tinan ida ne’e sei ta’is buat hotu.

Nia esplika, atu loke rejista foun ba veteranu ne’ebé la rejista iha 2003 no 2009, presiza altera lei ba veteranu, tanba lei hateten katak laiha dalan atu loke rejistrasaun ba faze datoluk nian.

Gil salienta presiza hili veteranu antigu iha komisaun verifikasaun ne’e, nune’e nia bele koñese ninia ema iha prosesu funu ba libertasaun nasionál no Komisaun Omenájen sei involve nafatin iha verifikasaun ne’e.

Nia haktuir, veteranu ne’ebé rejista iha tinan 2009 hamutuk 124,600 resin no tinan 2003 nian balun rezolve ona.

Jornalista: Evaristo Soares Martins

Editór: Xisto Freitas

Lee mós notísia ne’e: http://www.tatoli.tl/2019/06/veteranu-124-600-tama-iha-verifikasaun/

1 KOMENTÁRIU

  1. JUSTRU BUAT IDA KUNHESE NIA EMA NE TAUK BUAT IDA KONGKALIKONG…TRAIDOR IDA COMO VETERANU IDA NIA FAMILIA..NIA AJUDA FALSIFIKA DOKUMENTUS HODI BAGI HASIL…IDA NE MK AKONTESE DALA BARAK ONA

HAKEREK NO HATÁN

Please enter your comment!
Please enter your name here