Xefe Estadu Maiór Jenerál F-FDTL, Majór Jenerál, Lere Anan Timur. Imajen/ António Gonçalves

DILI, 05 juñu 2019 (TATOLI)-Xefe Estadu Maiór Jenerál FALINTIL-Forsa Defeza Timor Leste (F-FDTL), Majór Jenerál, Lere Anan Timur, hatete, tempu ona ba Governu atu moderniza  material pezadu ba instituisaun Forsa Defeza hodi apoiu profesionaliza forsa armada sira bainhira partisipa iha  misaun ONU ba  manutensaun pás  iha mundu.

Lere Anan Timur  hateten, partisipasaun delegasaun forsa espesiál tuir ezersísiu konjunta ho forsa internasionál hosi Portugál, Brazíl, Fransa no Inglaterra, foin lalais ne’e, iha Portugál hetan valor no rezultadu di’ak. Maibé, Majór Jenerál Lere hatete, difikuldade maka forsa  F-FDTL sira seidauk apár ho material pezadu forsa sira iha rai li’ur  ne’ebé moderna tebes.

Instituisaun F-FDTL to’o oras ne’e seidauk iha material infantaria, armas pozada hanesan morteiru no cardila tanba ne’e, tuir Lere Anan Timur, to’o ona tempu atu governu fó atensaun ba dezenvolvimentu instituisaun forsa defeza.

“Ohin ha’u dehan ba Prezidente Repúblika katak tempu ona atu hadi’a forsa armadas,”  hateten Lere Anan Timor ba Jornalista sira iha Palásiu Prezidensiál, Bairru-Pité Dili.

Komandante FALINTIL ne’e esplika, ko’alia kona-ba profisionalizmu forsa sira la’ós haree de’it hosi sira ninia uniforme militár, maibé haree mós hosi kondisaun moris di’ak no material ne’ebé suporta atu profesionaliza.

“Hanoin ita nia governu liuhosi Ministru Defeza la’ós ema foun tanba komanda ona forsa dezde 2001 to’o agora  entaun tenke rezolve,” hateten Lere Anan Timur.

Majór Jenerál ne’e haktuir  iha konstituisaun RDTL  artigu 146 ko’alia kona-ba defeza no seguransa nasaun nian iha númeru ida hakerek;  ida, Forsa Armada Timór-Leste nian, FALINTIL-FDTL, ne’ebé sidadaun nasionál de’it maka halo parte, ne’e mak responsavel ba defeza militár Repúblika Demokrátika Timór-Leste nian no nia organizasaun nu’udar ida mesak ba territóriu nasionál tomak.

Rua, FALINTIL-FDTL garante independénsia nasionál, integridade territoriál, liberdade no populasaun nia seguransa hasoru agresaun ruma ka ameasa externa, ho respeitu ba orden konstitusionál.

Tolu, FALINTIL-FDTL labele iha partidu polítiku no rona de’it ba órgaun soberanu kompetente sira, tuir Lei-Inan no lei, no sira labele halo intervensaun polítiku naran ida.

Jornalista      : Agapito dos Santos

Editór            : Francisco Simões

HAKEREK NO HATÁN

Please enter your comment!
Please enter your name here