dr. Daniel Murphy bainhira halo konsulta médika ba pasiente iha Klínika Bairro Pité. Foto google

DILI, 5 juñu 2019 (TATOLI)—Responsável Klínika Bairro Pité ne’ebé kompostu hosi Diretór Klínika, Daniel Murphy no Jestór Klínika, Inácio dos Santos hasoru malu ho Primeiru-Ministru (PM), Taur Matan Ruak, hodi husu tulun finanseiru ba governu.

Diretór Klínika Bairro Pité, Daniel Murphy haktuir klínika iha serbisu barak atu halo maibé laiha orsamentu natón, tanba ne’e buka hela meiu oioin hodi klínika bele funsiona ho di’ak no bele ajuda ema barak, nune’e mós atu fó tulun ba ema ne’ebé serbisu iha Klínika Bairro Pité tanba durante fulan tolu to’o haat ona la simu vensimentu.

“Ami frustadu tanba serbisu di’ak no ajuda ema barak maibé laiha rekursu sufisiente atu suporta. Ami tenta buka rekursu maibé ikus mai la hetan buat ruma. Ida ne’e sei implika ba povu Timor, liliu sira ne’ebé moras (pasiente). Durante tinan 20 ona, dezde tinan 1999, ami serbí timoroan no ami hakarak kontinua hala’o misaun ne’e, maibé agora lahatene oinsá atu funsiona”, nia tenik ba jornalista sira iha Palásiu Governu, kuarta ne’e.

Daniel informa, orsamentu atu funsiona klínika refere maizumenus ho montante $50.000 kada fulan tanba klínika ne’e klínika boot ida.

Hatán ba kestaun ne’e, Jestór ba Klínika Bairro Pité, Inácio dos Santos esplika Xefe Governu husu responsável Klínika Bairro Pité hodi bele halo planu ba tempu naruk atu bele hetan ajuda ne’ebé sufisiente hosi governu.

Nia hatutan, governu sei buka mekanizmu oinsá hodi bele suporta Klínika ne’e tanba osamentu mai hosi Orsamentu Jerál Estadu (OJE), nune’e tenke kria mekanizmu hodi bele hetan suporta ho kontinuidade hosi Governu.

“Sei kria mekanizmu entre Klínika Bairro Pité ho governu para ba oin iha suporta ne’ebé fiksu hosi governu ba klínika ne’e, nune’e labele fó impaktu ba pasiente rasik”, nia katak.

Inácio informa, maski hetan ona suporta hosi Ministériu Saúde maibé iha fulan tolu tenke paradu, entaun klínika tenke hapara atividade balun tanba orsamentu la sufisiente atu la’o. Tanba ne’e mak PM hakarak halo kooperasaun entre Klínika Bairro Pité no Governu hodi bele iha orsamentu sufisiente.

Molok ne’e, responsável sira tenta manda proposta ba Gabinete Fundu Sosiedade Sivíl iha Gabinete Primeiru-Ministru nia tutela maibé fundu ne’e la sufisiente atu suporta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here