Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen António Gonçalves

DILI, 5 maiu 2019 (TATOLI)Ministru Reforma Lejizlativa no Asuntu Parlamentár, Fidelis Manuel Leite Magalhães, hateten Timor-Leste (TL) sei akompaña didi’ak lala’ok Austrália nian hafoin halo ratifikasaun ba akordu Fronteira Marítima (FM).

“Governu ho Parlamentu la’o hanesan hela, katak akompaña didi’ak lala’ok iha parte Austrália nian. Ita mós hatene katak bainhira momentu to’o, ita avansa ho diskusaun ba ratifkasaun,” Ministru Fidelis ba jornalista sira liuhosi konferénsia ba imprensa iha Palásiu Governu, ohin.

Nia dehan, prosesu atu halo ratifikasaun ho prosesu dada kadoras la’o hanesan. Prosesu hotu ne’ebé mak la’o sei kontribui ba dezenvolvimentu liuhosi dada kadoras mai Timor.

“Buat rua ne’e tenke la’o ho preparativu, tenke hakat hamutuk,” dehan Ministru Reforma tenik Fidelis.

Governu Timor-Leste ho Austrália asinatura akordu foun fronteira marítima iha Nova Iorke, loron tersa (6/03/2018), tempu hanesan iha Dili loron kuarta (7/03) tuku 07.00 dadersan. Iha momentu ne’ebá, Austrália fó-sai kedas sira-nia pozisaun kona-ba mina-matan greater sunrise.

Ministra Negósiu Estranjeiru Austrália nian, Julie Bishop, ho Ministru-Adjuntu Primeiru Ministru nian ba Delimitasaun Fronteira Timor-Leste, Hermenegildo Pereira, asina akordu fronteira marítima ne’e ho sasin hosi Sekretáriu Jerál Organizasaun Nasaun Unida (ONU), António Guterres ho Prezidente Komisaun Konsiliasaun, Embaixadór Peter Taksøe-Jensen.

Hafoin asinatura ba akordu fronteira marítima foun ne’e, Xefe Negosiádór Prinsipál, Kay Rala Xanana Gusmão kontinua hala’o diskusaun ho kompañia petrolíferu sira kona-ba konsórsiu sira iha greater sunrise.

Iha fulan-outubru, tinan 2018, ConocoPhillips no Governu Timor-Leste konkorda termu fa’an nian kona-ba partisipasaun iha kampu Greater Sunrise.

Governu Timor-Leste ramata ona prosesu kona-ba sosa partisipasaun hamutuk %30 hosi Conoco Phillips no %26,56 hosi partisipasaun Shell Austrália nian iha kampu sira Greater Sunrise nian, loron 16 abríl 2019, iha Singapura, hodi fó ba TIMOR GAP, kompañia petrolífera nasionál Timor-Leste nian, partisipasaun hamutuk %56,56.

Tranzasaun kona-ba venda ne’e kobre interese partisipativu sira hosi Conoco Phillips no Shell iha kontratu fahe produsaun nian sira 03-19 no 03-20 iha área Konjunta Dezenvolvimentu Petrolíferu ne’ebé harii ona bazeia ba Tratadu Tasi Timor nian, akordu sira jestaun nian ne’ebé iha ligasaun no kontratu sira arrendamentu nian NT/RL2 no NT/RL4 ne’ebé mak Austrália fó-sai.

Hafoin Tratadu kona-ba fronteira marítima entre Estadu rua ne’e hahú vigora, kampu sira hosi Greater Sunrise sei inklui iha área Rejime Espesiál Greater Sunrise nian no sei sujeita ba ezersísiu konjuntu jurisdisaun nian bazeia ba tratadu foun.

Kampu sira hosi gás naturál no kondensadu Sunrise no Troubadour nian, ne’ebé hamutuk hanaran kampu sira Greater Sunrise, lokaliza besik kilómentru 150 iha sudeste Timor-Leste nian no kilómetru 450 iha noroeste Darwin, iha Territóriu Norte Austrália nian.

Timor GAP halo parte ba parseiru sira hosi Konsórsiu Greater Sunrise: Woodside (operadora) ho ida partisipasaun hamutuk 33, 44% no Osaka Gas ho 10%.

 

Jornalista: Evaristo Soares Martins

Editór: Xisto Freitas 

HAKEREK NO HATÁN

Please enter your comment!
Please enter your name here